La sdang thnem biangka ktem jong ka Congress

Ka Congress, ka la nang khlain bor ha kine ki sngi bad ia katei la iohi, ba tang hapoh ka shibnai, ki la don ar tylli ki jingpdiang burom ia ki nongialam, kiba leit pyniasoh ialade sha katei ka seng bad kata ruh kam dei shuh, na ki kyndong kynshrot jong ka Ri Khasi Jaintia, hynrei, ki dei na ki dong bapher jong ka nongbah Shillong.

Khyndiat taiew mynshwa, ka seng Congress, ka la pdiang burom ia ki spah ngut ki dkhot jong ka seng UDP, NPP bad VPP, na Shillong West, katba ha ka sngi thohdieng ba ladep, la pdiang sa ia ki bun spah ngut kiwei pat bad kitei ki kynthup ia kiba na Nongthymmai Constituency, na Sohiong bad na kiwei pat ki bynta jong ka Ri Khasi bad kitei ki kynthup ia shibun ki dkhot na ka seng TMC, VPP bad kiwei ruh.
Ka jingwan phai jong kiba bun ki nongialam na ki jaka sor sha ka seng Congress, ka pyni pleng, ba ki sngewthuh, ba lada ka jingialeh jongki, ka long pyrshah ia ka NPP, BJP; kumta kam don da kawei pat ka lynti ban ia pyni bor, lait noh na ka seng Congress bad kata ka jingleh shongshit jong kiba bun ha ka elekshon MP, ba dang shu dep, ka long, namar ba ki la jlep ia U Ma Vincent Pala, uba la long MP, la laisien kynthih bad ba kim shaniah ruh ia kine ki kynhun synrop MDA bad kumta, ki la ai jingkyrshan matlah ia ka seng thymmai VPP.

Hynrei ki dak ki kren shai, ba katei ka seng, kaba la jop ha ki 32 tylli ki Constituency, ha ka elekshon MP, ba dang shu dep, kam lah ban leh eiei, wat tang iwei i kam ba shi dana ruh, haba U MP jong katei ka seng, ula don ha Lok Sabha, la shiteng snem kynthih, hynrei kaba ima, ka long pynban, ba lyngba ka jingdon jong utei u dkhot uba marwei ha Lok Sabha, kumba ka sorkar India, ka pyndonkam da ki buit barieh jongka, ban nion ia u paidlang ka jylla bad ka mat kaba ha khmat duh, ka dei halor ka jinglong jingman ka NEHU ha kine ki sngi bad ka daw, ka lah ban long lehse, ba une U MP, ban kyrshan ia ka seng BJP ruh um mon bad ban don lang bad ki liang pyrshah, ban ther tyngeh ia ka BJP ruh um treh bad kane ka jingleh khyllah, ha kat ka iing dorbar, kaba don haduh 543 ngut ki MP, kam don jingmut eiei ruh em, hynrei, kan shu pynlong pynban, ba un duh ia ka jing iatrei lang ki dkhot, lada dei na ka liang synshar ne liang pyrshah ruh kumjuh.

Kumta kitei hi ki jingshisha, ki pyni, ba ka lyer iewbih jong ka seng Congress, ka la sdang ban beh biang ha Ri Khasi Jaintia bad katei ka pyni, ba ha ka elekshon MLA 2028, kumba ka Congress, kan dei kawei na ki seng, ka ban wan ha khmat ha ka jingiaknieh ia ka sorkar ha ka jylla Meghalaya bad kan dei tang kane ka seng, ka ban bret noh ia ka BJP, NPP na ka bor synshar ha jylla.