Bun ki skul sha West Khasi Hills, kim tip ba lait tuh jingkylli

Nongstoin, 27 Naiwieng:
Ha kaba iadei bad ka jinglait tuh jong ki jingkylli MBOSE class IX kiba bun ki skul ha West Kasi Hills District kimda ioh tikna ia ka jingtip lane ioh ia ka jingthoh lyngba ki bor ba dei peit khamtam ki skul kiba don sha ki kyndong kynshrot jong ka District bad kiba bun hi ki sngewkyndit haba ki iohi ha ki kot khubor.
Na ka liang jong u nongthoh khubor u la pyrshang ban wad jingtip na ki katto katne tylli ki skul kiba don kham sha kyndong na sor Nongstoin kiba hap ban pynialeh eksamin ha ka Board ia ki khynnah pule klas IX, bad na ka liang jong ki bor pyniaid skul kila iathuh ba ki shu tip lyngba ka jingioh SMS ha ki mobile phun bad don pat kiba ioh jingtip lyngba ki bor pyniaid skul na ki skul kiba don ha sor Nongstoin lyngba ki phun.Nalor kiba kum kitei ki skul don ruh kiba la shu tip lyngba ki kot khubor bad ruh da ka jingialap ki briew sharum sha neng ba ia ka eksamin klas IX la pynkynriah noh sha ka 4 tarik nohprah namar ka jinglait tuh ki jingkylli.
Shuh shuh u Nongthoh khubor u la iohlad ruh ban kylli ba ki don jingtip ne em ba katno tylli ki subjek kiba ki la ioh jingtip ba ki la lait tuh bad ba la pynkynriah ia ka jingthoh eksamin hynrei na ka liang jong ki kila ong ba haduh mynta ki dang sngew bad tip tang ia ka subjek science hynrei ia kiwei pat ki subjek kim shymla ioh jingtip ei ei ruh em.