Leit kynduh MBOSE ka FKJGP

Shillong, 27 Naiwieng:
Ka FKJGP Central Body mynta ka sngi ka la leit ban iakynduh ia u Bah M. Marbaniang, Dy. Director jong ka Meghalaya Board of School Education (MBOSE) ban pan jingshai halor ki jinglait tuh ki jingkylli klas IX. Ha katei ka jing leit iakynduh ki nongialam jong ka Seng kila ban jur ia ki Nongpyniaid jong ka MBOSE ba ki dei ban thung noh da ka kynhun tohkit kaba kyrpang ban lap ia kiba donkti ha katei ka kam beain bad ban ai ruh da ka jing pyn saja kaba tyngeh ia baroh kiba donkti khnang ba kum kine ki jing jia kiba la pyn hiar dor ka pule puthi kin ym jia shuh bad ba kan long ka jing sneng ia kiwei pat nangne shakhmat.Ki nongialam ka FKJGP ki la ong ba u Bah M. Marbaniang, Dy. Director jong ka Meghalaya Board of School Education (MBOSE) u la pyntip ba ki bor kiba dei khmih ka la dep thung ia ka kynhun tohkit ha kaba la khlieh da ma u hi ban pyndep ia ka jing tohkit kloi katba lah ia kaba la sdang ban pyn iaid shaphrang ia ka jingtohkit naduh mynhynnin ka sngiha kaba na ka liang jong ka MBOSE kala ujor ruh da ka ejahar ar tylli ha Jaintia Hills District bad kawei pat ka Sardar Police Station, East Khasi Hills District.
Ki nongialam ka FKJGP ki la ban jur ba ka MBOSE kam dei ban shu hun noh tang hadien ba la ujor ia ka FIR, hynrei ka dei ban pynlong ia ka jing buddien kaba tikna ban lap ia ki jingshisha baroh, shuh shuh ki la ong ba ka jingleh jong ar bad lai ngut kiba donkti ha kaba pyllait tuh ia ki jing kylli kala pynlong langkñia ia palat Hynriew phew hajar ngut tam ki khynnah pule kiba pule ha ka Class IX bad lyngba kine kiei kiei kiba la jia mynta kan pyn duh mynsiem ia ki khynnah pule kiba trei shitom bad kiba duriap ha ki jing pule. Ka la maham tyngeh ruh ia baroh kiba donkti bad lada ki bor pyniaid kim lah ban pyn shitom ynda la kut ka jing tohkit, ka seng hi kam banse ban shim da kiwei pat ki lad ki lynti kiba katkum ka Ain ban rat diengkhong ia ki kruin kiba pyrshang ban pyn sniewdur ia ka pule ka puthi ha ka jylla.