Pyrshah ka KSU Mawshynrut, ban wanrah ktem shipai ha Mawlan

Nongstoin, 27 Naiwieng:
Ka KSU Mawshyn rut Circle kala rai ban pyrshah jur ia ka jing thmu jong ka sorkar Assam ban shna ia ka ktem shipai hapoh ka shnong Mawlan kaba hap hapoh ka thain Langpih, bad kala  pynrem jur ruh ia ka sorkar jylla ka bym shym la leh ei ei halor katei ka jingthmu jong ka Assam ban wan buh ia katei ka ktem shipai hapoh u pud u sam jong ka jylla.Ka kyrwoh bala phah da u nongialam jong katei ka seng u samla Armstrong Sohshang, President ka KSU Mawshynrut Circle u la ong ba ka seng ka ieng pyrshah halor ka jingthmu jong ka sorkar Assam ban shna ia katei ka jaka sah jong ki shipai hapoh ka shnong Mawlan bad ka dawa jur ia ka sorkar Assam ba ka dei ban pynsangeh mardor ia katei ka jingthmu kaba long pyrshah ia ka mon jong ki paidbah kiba sah ha katei ka thain.
Shuh shuh u la ong ruh ba kajingshlur jong ka Assam ban wan wan shna ia katei ka ktem shipai ha Mawlan ka dei namar ka jingdon ki katto katne ki khwan myntoi da ka jingthmu ban die duh ia katei ka jaka sha ka Assam, bad kane ka pynpaw ruh ia ka jingshah iai klun ki jaka khappud jong ka Meghalaya. Na ka liang jong ka seng ka la byrthen tyngeh ba lada ka sorkar Meghalaya kam lah ban leh ei ei noh kloi halor katei ka bynta, naka liang ka seng kam banse wat ban iaid da ki lynti kiba kham tyngeh.