Ym don shuh kata ka jing burom para briew, kam don shuh ka jing iatiplem, mih tang ki jing jia khyllah

Albert Maring, umdap Dumu Ri-Bhoi District.

Katba nangmih ki sngi dap tang ki jing ma jingsyier, ki jing pyntieng pynsmiej ha ka imlang ka sahlang. Ym don shuh kata ka jing burom para briew, kam don shuh ka jing iatiplem, mih tang ki jing jia khyllah, ki kam pyn triem, ki kam batbor, rahbor, thombor iaki kynthei ki khynnah haduh ki rangbah, tang ki jing ia pyniap klep, ki jingiakput bym don shuh ka jing ia map para briew, haduh ka leit ka wan, ka iaid ka ieng , ym don jing shngain shuh kaei kane bad naei ka mih kaba kum kane ha ka imlang ka sahlang jong ngi, la rung da ka mynsiem ksuid, ka bishni, ka sarong, ka atnud, ka khwan myntoi shi met, ka mynsiem arsap, ka jing kwah rhah, ngi khim mynsiem, ngim don jing suk mynsiem, ngim long palei ha ka jing mut jing pyrkhat , ka mynsiem iarap lem bad pyrkhat lem ia ki wei kam don shuh. Kine ki daw kiba long maw jyn thut kiba khanglad ia ka shong suk shong sain, kine ki dei ki kam jong ki riew dum, ki riew khlaw bad ki riew thrang snam ha kaba ngi kum ka imlang ka sahlang , ngim lah ban pdiang da lei lei. Ka jing ia shoh ia dat, ka byrngem ka byrsit bad ka jing ia kput , kin ym wanrah jing bha lano lano.

Ngi donkam ban im ha ka suk ka sain, leh noh ei ka spah ka phew, ki jing don jing em, ka jing nang jing tip jong ngi, ka rynieng ka ryniot, ka dur ka dar, ka bor ka sor kaba mangi , ngi don lada ngim don ka jingiatip lem para briew, kaba mut ka jing ia burom, ka jing ia map bad ka jing ia ieid para briew. Haba kren shaphang ka jingieid kam shym mut tang ka jing iaieid samla kynthei bad shynrang, ha kaba u shynrang u ieid ia ka kynthei lane ka kynthei ka ieid ia u shynrang, haba don ka jing ieid ka don ka jing suk bad ka jing bha ha ki liang baroh.

Kum ki briew ngi don shibun ki jing tlot bad ki jing duna, ym don ba lah ban pyn sngew bha lut ia baroh , hynrei to ngin don ka mynsiem ban ia burom ia ki wei ki para briew jong ngi, katba ngi dang don ha kane ka sla pyrthei. Ym myntoi ban shu pyrto ieid, da kaba leh burom , kynmaw burom ynda u briew ne ka briew ki la iap noh kim don shuh hangne ha sla pyrthei.