Shillong: Ka Central Recruitment Board jong ka tnad Pulit Meghalaya ka la pynbna paidbah ba ïa ka Physical Efficiency Test (PET) la pynsangeh noh shuwa, hadien ba ki la don ki jingthut ha ka Physical Efficiency Test kaba la leh ha 1st MLP BN Mawiong Shillong bad 4th MLP BN Sohpian ha kine ki saw sngi ba la dep naduh 18 tarik haduh ka 21 tarik Naiwieng.
Katkum ka kyrwoh khubor ba dang shu pynbna ha ka 21 tarik Naiwieng na ka ophis ka Central Recruitment Board, Meghalaya Police ba la soi da u Dalton P Marak, IPS Inspector General of Police, (SB/F&ES/Bdr.), Cum-Chairman jong ka Central Recruitment Board bad u Bah Lakador Syiem, IPS Member Secretary, la ïathuh ba ïa kane ka kam la peit bniah bha da ka Board.
Ka Recruitment Board ka thrang ban pynthikna ba kan long ka Physical Efficiency Test kaba khlem jingbakla, kumta ka Central Recruitment Board Meghalaya Police ka pynsangeh noh ïa ka Physical Efficiency Test kaba dang ïaid shakhmat bad kan treikam noh mardor naduh ka 22 tarik u Naiwieng, 2024.
Ia ka tarik ban leh biang ïa ka Physical Efficiency Test yn sa pynbna pat kham hadien khnang ban ailad ïa baroh ki nongwad kam kiba dei hok ban pyndep ïa kane ka test.
Ka Board ka la kyntu ïa ki nongwad kam ba kin sngewbha ban long kiba ïaishah bad kiba shahshkor ban pynthikna ïa ka Test kaba hok, kaba khuid bad kaba paka. Na ka bynta kino kino ki jingkylli ki kyrtong kin sngewbha ban phone sha ophis jong ka Central Recruitment Board ha Mawroh, Shillong lane phone ha u nombar jingïarap, 633164273.
Phi don ban ong eiei?