Na ka 30tarik Naiwieng, sha ka 4 Nohprah, kynriah eksamin klas IX

Shillong, 26 Naiwieng:
Hadien ba ki jing kylli jong ki khynnah klas IX, ki la lait tuh biang mynta u snem ruh, ka MBOSE ka la pynkynriah noh ia ka eksamin na ka bynta ka sobjek Science and Technology na ka 30 tarik u naiwieng sha ka 4 tarik u nohprah. Ka la bthah ia baroh ki Co-Ordinating Officer kiba dei peit ba kin leit lum ia kitei ki jingkylli thymmai na ophis jong ka Board kaba don ha Tura bad Shillong ha ka 3 tarik u nohprah bad ki dei ban sam sha ki skul kiba hap hapoh la ka jong ka Deposit Centre ar kynta shuwa ban sdang ka por ia leh eksamin ha ka 4 tarik u nohprah.
Halor ka jinglait tuh katei ka jingkylli klas IX, ki bor ka MBOSE ki la ong ba kin thung ia ki bor tohkit ba kin tohkit bniah bad ki la byrngem ba yn pynshitom ia kito ki Co-ordinating officer bad ki heh jong ki skul bapher bapher lada jia ba ki lap ia ka jingshisha. Ka Board ka la pyntip ruh ba ka la ujor ejahar pyrshah ia katei ka jinglait tuh ka jingkylli klas IX.Halor ka jingset jingkylli jong ka board ia ki khynnah klas IX, ka MBOSE ka la kam ba ka la leh ia katei khnang ban wanrah ia ka jingiaryntih ia baroh ki skul kiba la rejistar bad ka MBOSE bad ba kan long ruh ka jingpynkhreh ia ki khynnah na ka bynta ka eksamin Matrik katba ki klas XIpat ba kan long ka jingpynkhreh ia ka eksamin klas XII. Ka la pyntip ruh ba shuwa ba kan sam ia ki jingkylli sha ki Deposit Centre ka la buh ki kyndon kiba pyrkhing ia ki he jong ki skul bad ki co-ordinating officer ba kin shim ia ka jingkitkhlieh khnang ban ym mih kano kano ka jingjia kum ka jinglait tuh ki jingkylli, ka jingduna ki jingkylli sha ki khynnah bad ha baroh ki liang.