Ka la mih ka jingkynthah jong kiba bun, ia ka iaid ka ieng jong ki heh ki hain sorkar, hadien ba ka don ka jingiap jong uwei u rangbah ha ki khyndiat sngi ba ladep ha ka jingleit tamasa Cherry Blossom.
Ha shwa ban iakren ia kane ka mat, ka la dei ia ka tnat shangkai pyrthei jong ka sorkar jylla, ba kan pynbeit bha noh ia ki jaka pynlong tamasa, ba kan nym don ka jing ia thyngngian jong ki nongleit peitkai, kumba ka la jia ha kine ki ar sien, ba la pynlong ha Bhoirymbong bad haba shu peit, ka la i dei eh ban pynlong noh ha ki jaka ba don ki surok heh bad ka nuksa ka long kum ha Madan Polo, ha Golflink bad sa kiwei ki jaka, kiba ym donkam ban ia leit bad wan phai na kajuh ka surok.
Ki kali kiba leit sha kitei ki tamasa, ki don da ki hajar tylli bad kiba ia leit kiba ia kyrkieh suda bad kumta ka jing ia thyngngian, ka bym long pyrthei shuh bad shu donbok, ba kam don kano kano ka jing ia tynrah kali ha ka por ba leit ba wan bad khamtam ha ka por ba wan phai, hadien ka jingpeit miet baroh shimiet ha katei ka jaka bad ka thait ka jrem, na ka ia shad ia kyrdem.
Nangta ka wan sa kata kaba ki ia ong ha kine ki sngi, ka vip culture lane ka jingiaid jong ki heh ki hain bad hangne te ngin ialeh shuh kumno, haba u paidbah nongjied u ia kwah ban ia shong lang da ka bos ne taksi haba ia leit ia wan bad ki heh ki hain bad katei ka jingmut ka long ba ki 60ngut ki MLA, ki 3ngut ki MP lem bad ki 90ngut ki MDC, kin iaid da ki kali kamai haba ki iaid ha Shillong lane kin shong da ki bos bad ki sumo, haba ki leit jingleit shabar ka nongbah.
Kata ka don ka mat, kaba hap iakren halor ka jingiaid jong ki heh ki hain, hynrei hangne kam thew ruh tang ia ki 12ngut ki myntri sorkar; hynrei kaba kiba bun ki kham peit sniew, ka long, haba ki Vice Chairman, ki Chairman, ki dkhot bapher jong ki tnat sorkar, ki iaid da ki light saw bad ki knieh ha khmat ha khmat, ia ki kali jong ki paidbah bad kaba kum kane ka jingleh, ka donkam ban sloit syndon naduh na tyllong, ba kine ki riew shutia, kin nym ioh lad ban iuhroit ia ki kyndon pyniaid kali, kiba teh ia baroh.
Hynrei, ha kajuh ka por, ka mih sa kawei ka jingkylli bad kata ka long, ba ki ia kynthah ia kata ka vip culture, tang na ka daw, ba ki don ki pulit kiba synran ia ki heh ki hain bad ba ki tynruh na khmat na khmat, wat ha ki surok kiba khim; hynrei ym ju don mano mano ba ujor, haba ki myntri sorkar, ki thied ia ki kali kiba remdor kum ki Toyota, ki Fortuner kiba shongdor da ki 30, 40 lak kawei kawei ka kali bad kitei ki kali remdor ki dei kiba stet bha ruh ban iaid bad haba phi shah ba kin thied ia kitei ki kali, phim dei kein ban ujor, haba ki shu suh wiaw wiaw ha ki surok bah.
Nalorkata, ka don sa kawei ka jingai jingmut bad kata ka long, ba lada dei u heh hain ruh, u dei ban sngewthuh, ba lada u iaid ha ka surok bah National Highway, kumta, u dei ban suh wiaw wiaw, hynrei, lada u iaid pat ha ki surok shnong kiba rit bad kiba khim bad lada u pynsawa sa ka siren, kumta katei ka jingpah ka pynthut ia kiwei ki nongniah kali bad ka wan rah ia ki jinghap kali sha ki riat ki ram, na ka jing ia lymbub para kali, ba shah tynruh ha kitei ki kali jong ki heh.
Phi don ban ong eiei?