Byrthen ka KSU EB ia ka jingthombor ka Assam ha madan Umwang

Nongpoh 26, Naiwieng:
Ka Khasi Students’ Union (KSU), Eastern Border Area ka la byrthen jur ia ka jingwan pynpra ka Assam ia ka jingtei ka Sericulture ha madan Umwang ka Ri-bhoi district.
U President ka seng u Bah Banjop Maring u la pynpaw ia ka jingbynñiaw bad ha kajuh ka por ki la pynpaw ruh ia ka jingbitar kaba khraw ia kane ka jingwan thombor ki bor ka sorkar Assam.
Ha kane ka 25 tarik Naiwieng, ki nongialam seng bhalang bad ki nongshong shnong katei ka thaiñ ki la jurip ia katei ka jingjia, ba kynthup ia ka KSU bad ka CSWO (I).
Haba kren ha katei ka sngi u Bah Banjop u la ong ba ka jaka bad ka shnong Madan Umwang ka dei ha Meghalaya hapoh u Syiem Raid Nongtung.
U la byrthen ba ka sorkar Meghalaya ba kam shym la leh eiei ia kane ka jingthom bor ka Assam. “Ka KSU ka la long kaba la khreh ban ieng ialeh ban iada ia la ki jaka puta hapoh ka Rilum Khasi ban tur shakhmat da ka thma pyrshah ia ki bor ba nabar jylla wat ban iaumsnam ruh “, la ong u Bah Banjop.
Katba ka Kong Christabel Wanniang, General Secretary ka CSWO (I) ba kane kam dei shuh ka sien kaba nyngkong ba ka Assam ka la wan thombor hynrei kiba la ju jia na ka por sha ka por bad kyntu ba ka sorkar Meghalaya ka dei ban shimkhia ioh mih ka jingjia umsnam.“Shaei kata ka jingpynneh ia ka status quo hapdeng ki ar jylla haba ki paidbah ki dang mad ia kiba kum kine ki jingjia ba sngewsih”, ka la ong.
Katba u Bah B Sohtun u President ka SRS Raid Nongtung u la ong ba naduh u snem 2013 haduh 2014, ka Assam ka dang bteng beit ia kiba kum kine ki jingpyndik bad ka long kumba hiar thma kynsan ki lehnoh ba shyrkhei. U la ong ba dang shen u Myntri Rangbah, ka myntri kam pohiing ha ka jingialang ha Secretariat bad ki Rangbah Shnong ka thaiñ khappud la kdew ba ka Madan Umwang bad ka Block II hi baroh kawei ki dei kiba hap hapoh ka Meghalaya hynrei balei ka Assam ka dang bteng ia kine ki kam thombor.
Kumjuh u Rangbah Shnong ka Madan Umwang, u Bah Blikshon Mukhim uba la iam pait dohnud, u la ong ba ha ka 11 tarik Naiwieng, la bthah da ki bor ka Assam ban pynsngeh ia kane ka jingtei, ki la leit ujor sha ka Deputy Commissioner ka Ri-Bhoi district hynrei ha ka 20 tarik Naiwieng u Majistor ka Assam bad ki pulit ki la wan ban pyndik bad phah pynsangeh biang ia ka jingtei. “Dei ha ka 24 tarik janmiet kumba 3 baje ei ei ki pulit Assam ki la pyni bor syndon da kaba wan pynlko pom ia katei ka jingtei”, u la ong.