“Ki Rangbah Shnong Khasi –Pnar ki la bu-aid Kyiad, tang 3 baje janmiet”

Shillong, 26 Naiwieng:
“Ki Rangbah Shnong Khasi –Pnar ki la bu-aid Kyiad tang dap 3 baje janmiet” dei ki kyntien kiba u Lat ka jylla u la kren sha ki Rangbah Shnong ha ka jing iakynduh jong ki kaba la long ha ka 19 tarik mynta u bnai, ong ka kyrwoh na u General Secretary ka Synjuk Ki Nongsynshar shnong ka Bri U Hyn niewtrep u bah R.L Blah. Ha ka kyrwoh khubor u bah Blah u la ong ba u Lat u la iathuh ha ki ba la don ba ai jing mut ia u ba ki Rangbah Shnong Khasi Pnar ki dei kiba la bu-aid kyiad tang dap 3 baje janmiet bad kate u la ong ka la pyn kthang shisha ia ka Synjuk bad u la ong ba ka Synjuk ka pynrem jur ia kitei ki jingkren u Lat bad ka buh jingkylli ruh kumno kat u khlieh duh jong ka jylla un kren ia kiba kum kitei ki kyntien kiba pynjem rngiew ia ka jaitbynriew. U bah Blah u la ong ruh ba hangne ka mih ka jingkylli ba hato dei na kata ka daw ba u Lat u kheiñ dew thala ban ai jingmynjur ia ki ar tylli ki Bill kiba ia dei bad ki Riti ki dustur ka bri u Hynniewtrep?.
Ka kyrwoh ka la ong ruh ba ha ka 19 tarik mynta u bnai ki Rangbah Shnong ki la mih jew slew na katei ka jingiakyndh ia u Lat, naba u khlem ai kano kano ka jingkular kaba pynhun ia ki haor ka VAB jong ka KHADC kaba don mynta ha ka home Ministry. Hadien katei ka jingiakynduh ia u Lat ki Rangbah shnong ki lashing jingialang biang ha ka 24 bad 26 tarik mynta u bnai ban ia pyrkhat sani bha ia kitei kijingkren jong u.
U bah Blah u la pyntip ruh ba ha kaba iadei bad ka bill jong ka JHADC u Lat u la kubur ba ka long kaba biang nadong shadong khlem kino kino ki jingwit la jar katta ruh u la kyntait pat ban kular ia ka synjuk ban ai noh ia ka jingmynjur bad u la ong pynban ba ki dei ban iai ap ia ka sngi ha kaba un ai ia ka jingmynjur jong u ia kitei ki bill.