Imphal: 23ngut ki briew, ki la shah kem, hadien ba ki la don kiba leit tur sha iing jong U Biren Singh, myntri rangbah ka Manipur bad nangta sa kiwei pat kiba leit pynjot pynpra ia ki iing ki sem jong ki myntri sorkar lem bad ki MLA ruh kumjuh.
Ka jing ia umsnam, kaba jubor bha, ka la jia ha ki them jong ka Imphal district, ha ka sngi saitjain, ha kaba ki iing jong shibun ngut ki MLA, ki la shah pynjot thiaw bad nangta ki don sa 6ngut ki riew paidbah, kiba la shah pyniap ha Jiribam, ha kaba la lap ia ki met iap jongki, hadien ba ki la shah rahbor ha ki seng kaikhlaw. Kitei kiba shah pyniap, ki kynthup ia uwei u khyllung uba dang phra, ha kaba la lap ha ka wah Barak. Kitei ki dei kiba la jah rngai naduh ka Lah Sngi U Blei, ha kaba ka don ka jing ia siat hapdeng ki ehrang Kuki bad ki CRP, ha kaba 10ngut ki ehrang Kuki, ki la shah siat iap.
“Phra ngut ki la mynsaw, ha ka jingpynpra ia ki paidbah bad sa 23ngut ki la shah kem” ong ka khubor na ki pulit Manipur haba thoh ha ka X.
Hynnin ka sngi, u paidbhur, ula hiar thma bad pynjulor ia kiba bun ki iing sah jong ki myntri sorkar bad ki MLA ha Imphal. Ki pulit, ki la siat da ki lyer pynsatkhmat ban pynpra ia u paidbhur. La iathuh ba kiba shah kem, ki dei na Imphal East, Imphal West bad Bishnupur district bad ki la ioh kurup ruh ia ka .32 pistol, hynniew tylli ki kuli SBBL, phra tylli ki mobile phone na kitei kiba shah kem.
Hynnin hi ka sngi, la pynjari ia ka korphiw bad la pynsangeh noh ia ka internet, ha ki bynta jong ka nongbah Imphal West bad Imphal East ruh kumjuh.
Phi don ban ong eiei?