Wan kiew ki longkmie na them Bhoi, ban duwai ia ki samla ba shah thngan ha NEHU

Shillong: Mynta ka sngi u Blei, ki longkmie na them Ri-Bhoi ki la wan kiew sha NEHU ban ai jingduwai ia ki samla kiba la pyllong ia ka jingiakhih shah thngan ha phyllaw ka skulbah NEHU.

Kane ka jingwan ai mynsiem jong ki longkmie ia ki samla kiba la pyllong ia ka jingiakhih ka long ban kin lah ban iakhun haduh ban ioh ia u soh ba thiang lyngba ka jingai bor jong u blei. Lah ban kdew ba ki samla pule ka NEHU kila pyllong ia ka jingiakhih shah thngan ban dawa hiar shuki syndon ia u Vice Chancellor ka skulbah North Eastern Hill University (NEHU), u Prof. Prabha Shankar Shukla hadien ba ula pyneh ban weng noh ia u Registrar bad u Deputy Registrar kiba la kynnoh ba kim bit satia ban trei ia ka kam. Ka jingshah thngan jongki samla pule ka la kot sha ka san sngi eiei haduh mynta bad la bun kiba la poi sha jaka sumar na ka jingkem pang. Lah ban kdew ba u Vice Chancellor ula pyneh hi triang ban ym hiar shuki kumba la dawa ki samla pule lane ban weng ia u Registrar bad u Deputy Registrar. Ha kajuh ka por, u la pynpaw ba u kloi ban pdiang ia ka jingiakren bad ki samla pule bad ki nonghikai bad ki kynhun ban pynbeit ia kane ka kynrum kynram.