Da ki syntiew, na u paidbah; leit buh U MLA ha lum jingtep U Maieid

Nongstoin, 25 Naiwieng: Tang mar ia jop ia ka elekshon shiteng samoi ha Nongstoiñ, u bah Diosstar Jyndiang u la kynmaw kyndiang ia u Maieid Hoping ha kaba baroh ki syntiew kiba la pyndeng bad pynkup burom ia u ha ka sngi niew vote baroh u la leit ban buh ia ki ha u Lum jingtep jong u Maieid Hoping. Ha katei ka jing leit iuh kjat sha Mawkyllei ka shnong u Maieid Hoping u bah Jyndiang, u la ong ba dei u Maieid Hoping uba la pynshlur ia u haduh ba un da poi shaduh katei ka thong bad u shim ba ka jingjop jong u ka dei ka jingurlong ki jing angnud u Maieid Hoping. Shuwa ia katei u bahduh Jyndiang u la leit ban buh syntiew ruh ha u mot jong u Wickliffe Syiem ha ka shnong Sohpian.Haba iakren sha ki nongthoh khubor na ka liang jong u bah Dios u la ong ba “Ngam lah khlem da kynmaw burom ia u Maieid namar dei lyngba ka jingkyrkhu ka jong u na sha lyndet kaba la pynlong ia nga ba ngan ioh ia ka jingjop ha kane ka jingiakhun elekshon shiteng samoi bad kane ka jingwan ban buh syntiew ka long kum shi bynta ban kynmaw burom ia u Maieid u ba la long kum u kpa jong nga mynba u dang don ha kane ka sla jong ka pyrthei”.
Haba la poi ha ka shnong Mawkyllei u bah Dios ha ryngkat kiba ha iing ha sem jong u lem bad ki ba ha iing ha sem jong u Maieid kila ia mih na iing sah jong u Maieid ha katei ka shnong ban leit sha u lum jingtep jong u Maiied na ka bynta ban leit leh burom ia u bad ha katei ka sngi kila pynlong ruh ka jingsngap jar kaba shi minit ha ka jaka tep ia u Maieid kum ka dak ban kynmaw burom ia u bad la pynkut ruh da ka jingduwai.