Pyrshah ka TUR ia ka jingkwah AFSPA ha ri Lum Garo

Shillong, 25 Naiwieng:
Ka Thma U Rangli Juki (TUR) ka la pyrshah jur ia ka jingpynmih hukum ka Meghalaya High Court ban pyntrei kam noh da ka aiñ Armed Forces (Special Powers) Act, 1958, ha ri lum Garo. Ka nongialam katei ka seng ka kong Angela Ryngad haba kren sha ki nongthoh khubor mynta ka sngi ka la ong ba katei ka hokum ka high Court ka la pynsniew dur pynban ia ka High Court namar ba ka dei ka ing ka ban peit bad bishar ia ka lait ka let jong ki paidbah ha ka ri synshar paidbah pynban ka pynmih pat da kaba kum katei ka hokum.
Ka TUR ka la kynnoh ba katei ka hokum jong ka high Court ka die ka jingpynkheiñ ia ka riti synshar ka ri kaba la buh kyrpang ha la ka jong ka jong ka jingpynbeit ban peit bad khmih ha la ki bynta. “Ka bor ban peit ia ki jaka ba long triem bad ba don jingma kum ka jingpyntreikam da ka AFSPA ka dei ha ka Executive, kata ka dei ka sorkar jylla ne ka sorkar pdeng” ong ka kong Angela Ryngad haba kren halor ka hukumka high Court kaba la mih ha ka 2 tarik u naiwieng kaba la ai jingmut ia ka sorkar pdeng ban pyntreikam da ka aiñ AFSPA ha ri Lum Garo.
Haba ther tyngeh halor katei ka rai jong ka High Court ka kong Angela Ryngad ka la ong ba ka ka jingkwah ka High Court ban pyntreikam da ka AFSPA ka pyni pynban baa k dei ma ka kaba kwah ban peit ia ka jingshong shngaiñ ka jylla bad ka la klet noh pynban ban peit ia ka hok jong ki paidbah da kaba ai ka jingbishar hok hynrei ka la knieh pynban ia ka bor jong ka Executive.