Ka bor ban teh lakam ia ki poiwir, ka dei beit ha ki bor synshar shnong bad ki bor hima

Ngi la ju kren kham mynshwa, ba ka bor ban teh lakam ia ki poiwir, kam dei ha ki sengbhalang, ha ka District Council ne ka sorkar jylla, hynrei ka dei ha ki nongsynshar shnong bad ki nongsynshar hima bad lada kitei ki long adkar, kumta ka la bha ka shnong ka thaw ne ka hima sima, hynrei lada kitei ki long lyngkar, kumta ki shnong bad ki Hima, ki la jot thiaw artad bad ka nuksa kaba bha tam, ka dei halor ka rai jong ki ar tylli ki dorbar shnong, ba kynthup ia ka Erpakon ha Ribhoi bad nangta sa ka Laitkor ha East Khasi hills.

Ka jingleh jong ka Hima Nongkhlaw, ka dei sa kawei ka nuksa kaba bha tam bad kata ka long, ba kam shah ia ki bar jylla ne ki poiwir, ba kin rung ha ka iew bah jong ka Hima, ka Iew Langstieh bad kam dei tang kata, la iohi ha ki rud surok jong ka nongbah Mairang, ba kim don ki poiwir kiba die madan, kiba shong dukan, kiba iaid ba ieng bad katei ka dei shisha ka Iew jong u khun khasi nylla.

Kaba itynnad shibun eh, ka long ba ha baroh ki dukan heh bad ki dukan rit, ki don hi ki trai shnong, ba kynthup ia ki shynrang bad kham bun ki kynthei kiba shong dukan bad katei ka pyni, ba kim kwah ban shu kamai kyrteng ne ban shu lum pisa da kaba suk, hynrei ki trei hi da la ka jong bor bad kumta haba rung ha Iew Lang stieh, la iohi, ba naduh ki dukan die wait, dukan slipar, dukan die tiar madan bad baroh jait ki jingdie, ki don da ki trai shnong suda.
U Syiem jong ka Hima Nongkhlaw, U Pa’iem PM Syiemlieh, u iathuh ha une u nongthoh, ba katei ka jingkhang ia ki poiwir, ka dei kaba la don lypa naduh ka por u menbarim bad katei ka iai neh haduh ha kine ki sngi, ha kaba ka iew Mairang, ka dei beit ka iew jong u khun Khasi bad U Pa’iem, u iathuh shuh shuh, ba ha katei ka Hima, kim shah ruh ban die jaka ia ki dkhar bad ia ki Garo bad katei ka dei ka rai kaba la ju don naduh mynshwa ha ka Hima.

Katei ka rai jong ka Hima Nongkhlaw lem bad ki jingshisha, kiba paw tyngkrein ha ka nongbah jong katei ka Hima, ka paw shai namarkata, ba ka bor lahduh ban teh lakam ia ka jingtuid ki mynder ri, kam dei satia ha ki bor sorkar ne ha ki bor District Council, hynrei ka ieng ha ka dustur ka riti, kaba la ju leh, da u mynbarim bad kata ka long, lyngba ki dorbar shnong bad haba ka long kumta, ka pyni shai, ba kito ki jingdawa ia ki ain teh lakam bapher, ki dei ki kam kwah burom suda, lada dei ia ki sengbhalang lane ia ki seng sain pyrthei; hynrei ia katei ka kam, ki dei ban aiti ban pyniaid da ka rukom uba rim bad ban bynshet beit ha ki bor shnong/ki bor Hima.