Ka jingwan ki mishoneri kam ktah ia ka synshar khadar “Ka jingsynshar ka iaid la ka jong, ka jingmane blei ka iaid la ka jong”

Bah RM Shabong
Mairang: Ha shwa ban rung sha ka ophis jong U Syiem ka Hima Nongkhlaw, ka don ka dur kaba dap shi rynieng jong U Syiem Tirot Sing, uba dei u khla wait jong katei ka hima bad katei ka dei ka nongmuna, kaba pyni ba katei ka Hima, ka don ia u nongialam uba dang shynrang shisha.

Ka long ruh ka jingleit lum khubor, kaba pher tam na kiwei, namar ba ka dei tang bad U Pa’iem PM Syiemlieh, uba dei u Syiem ba mynta jong ka Hima Nongkhlaw, ha kaba ngi iakren ia ka jingkhraw jong ka synshar khadar jong ki Hima Khasi, kaba naduh ki 500 snem mynshwa.

Ha ka jing iakren, kaba la don lang ruh U Syiem khynnah jong ka Hima Nongkhlaw, U Pa’iem KM Syiem; U Pa’iem Phrestar, uba dei U Syiem rangbah, ula iathuh ba ka jingshisha ka paw pyrthei, halor ka jingiaid lynti jong ka Hima Nongkhlaw, ka dei lyngba ka jingleit jurip jong U Colonel Herbert, uba dei U DC ka Khasi Jaintia District, ha ka snem 1902, ha kaba ula hiar hi dalade ha ka Hima Nongkhlaw, ban lum jingtip shaphang ki Syiem jong ka Hima, ka rukom hiar pateng bad jied Syiem bad utei ula thoh rekod bad la lap ia kitei ki jing shisha, katba kum ka jingthoh jong U Colonel Herbert, kaba don ha ki thiar buhkot bapher.

U Pa’iem u iathuh shuh shuh, ba lyngba ka thma jong ki phareng bad ka Hima Nongkhlaw, U Tirot Sing, uba dei kum u riew iohi jngai (statesman), u la lum la lang ia ki Syiem jong ki Hima bapher, ha kaba ki la iakren ban ia sngewthuh jingmut, na ka bynta ban ialeh pyrshah ia u phareng bad u ong “Ha katei ka jingiakynduh, ki don bun ki Syiem, kiba la mynjur ban iatreilang bad kumba ngi tip ka Hima Rambrai, Hima Nongstoin, Hima Myriaw bad kita ki la phah ia ki shipai jong ki ban iatreilang, ban ialeh pyrshah lang ia ki phareng”. Bad u iathuh ba U Syiem ka Hima Maharam, ula phah da ki briew ba kin ialeh thma pyrshah ia ki shipai phareng bad la iathuh ba ka shnong Mawmaram, ka dei ka shnong, kaba ki shipai jong U Syiem Maharam, ki la leit iuhkjat, ha ka lynti ban leit ialeh thma bad ki phareng bad u ong shuh shuh “Ynda poi hangto, la ioh jingtip, ba ula shah kem noh bad na kata ka daw, na ka bynta ka jing kynmaw ia ka jing wan jongki, ki la thung noh da u maw, hangtei ha Mawmaram bad ba sa tip, ia katei ka shnong Mawmaram”. Na lor kata, ka don sa ka Hima Nongmynsaw, kaba phah da ki shipai hi.

U Syiem ka Hima Nongkhlaw, u pyn sngew ruh ba ha katei ka por, ki shipai phareng, kiba dei ki shipai ba khlain bor tam ha ka pyrthei, hynrei ki shem jingeh shibun ban ialeh pyrshah ia U Tirot Sing bad ka dei na katei ka daw, ba katei ka thma, ka la neh haduh saw snem kynthih, ha kaba ia kiwei ki Syiem ha Assam, Bengal, ki la pynrem da ki taiew, katba ia U Syiem Tirot Sing, ki la pynrem “Ym da kaba jop thma, hynrei da kaba leit buit tuh” bad U Syiem Nongkhlaw, u iathuh shuh ba katei ka Hima, kaba iar naduh na Brahma shaduh sha Sorma, hynrei, ynda haba ki phareng, ki la ioh ban synshar, kumta ki la pharia noh ia kane ka Hima, ha kaba ia ka Sohiong, la ai ba kin syn shar noh ki Lyng doh, ka Maw phlang ruh ha ki Lyngdoh, ka Mawmluh pyn kylla Sirdarship noh.

Ha kaba iadei pat bad kawei ka mat, kaba ktah ia ka dustur riti, lane ka synshar khadar, na ka jingwan ki phareng lane ki mishoneri, U Pa’iem, ong “Ka jingwan ki mishoneri, kam ktah ia ka synshar khadar, namar ka synshar khadar, ka iaid la ka jong bad ka jing mane blei, ka iaid la ka jong ka jong bad ka hima nongkhlaw, ka long secular bad ngi ai laitluid ia baroh ki niam ba kin ia praktis la ka jong ka jong”.