Jah klep ki khyrdop talasi mynder ka sorkar ha East Jaintia

Shillong, 25 Naiwieng:
Ka AJYWO Central Body ka pynpaw  ia ka jingpyrshah kaba jur halor ka jingpynjah klep jong ka sorkar jylla ia ki lai tylli ki khyrdop (Entry and Exit Points) talasi mynder  kiba dei ban don ha East Jaiñtia Hills District. Ha ka jingiakynduh jong ki 13 tylli ki sengbhalang bad ka sorkar hapoh ka jingialam jong u Dr. Mukul Sangma, myntri rangbah ka jylla , U Bah M H Dkhar u la buh jingkylli halor ka jingpaw tang ka Malidor kum ka Entry /Exit Point ha EJHD, 3 tylli kiwei pat, kata ka Mooriap, Lakasein bad Umkyrpong kim paw shuh ha ka thup ba la sam da ka sorkar jylla sha ki nongialam jong ki 13 seng.
Ha ka jingialang ba la khot pynlong da u Dr Mukul Sangma, ban ia kren biang halor ki lad pyrkhing mynder ha ka jylla, U Bah M H Dkhar, President jong ka AJYWO Central Body, u la pan jingshai na na ka sorkar halor ka jingbym paw jong kitei ki lai tylli ki Entry/Exit Point ha EJHD ha ka thup hynrei u myntri rangbah bad ki ophisar jong u kim shym la ai ia ka jubab ka ba shai. “Ha ki jingialang ba la long kham mynshwa hapdeng ki 13 seng bad ka sorkar ban ia kren halor ki kam mynder, ha ka por ba ka S.K Jain’s Committee ka wanrah ia ki ka jingtyrwa halor ki Entry/Exit points ha ka jylla, ka AJYWO naduh kato hi ka por kam shym la pdiang ia ka jingtyrwa jong ka S.K Jain’s Committee bad ka la pan porn a u Mukul Sangma ba kan sa phah ia la ka jong ka thup halor ki Entry/Exit Points ha Jaiñtia Hills. Hadien ba ka AJYWO ka la phah ia la ka jong ka jingdawa halor kane sha ka sorkar jylla, ka sorkar ka la phah ia ki DC jong ka Jaiñtia Hills ban leit jurip halor katei ka jingdawa jong ka AJYWO”, ong u Bah MH Dkhar.
“Hadien ba ki DC na Jaiñtia Hills ki la dep ia la ka jong ka kam, ki la phah ia la ki jong ki ripod sha ka sorkar. Ha ka jingiadei bad ka West Jaintia Hills ki la don katto katne ki Entry/Exit Points ba la ia pynbeit thymmai katba ha EJHD pat, ka District Administration ka la pynskhem ia ki saw tylli Entry and Exit Point ba la tyrwa da ka AJYWO, kata ia ka Malidor, Mooriap, Lakasein bad Umkyrpong  bad ba ia ka ripod halor kane ka jingibiang ia kitei ki jaka la phah sha ka sorkar jylla da ka ophis u DC bad  ba ha ka jingbuddien jong ka AJYWO ia kane ka kam, la sngewthuh ba wat ia ka jaka ruh ka District Administration ka la ioh na ka bynta kitei ki saw tylli ki points”, ong shuh shuh u Bah Dkhar.