Naba don kiba leit byrngem, hap phet ki Doktor na PHC Umden, mad jingeh ki paidbah ba pang ba shitom

Nongpoh, 03 Naiwieng: Ki doktor kiba ju ai jingsumar ia ki paidbah ha ka thain Umden, lyngba ka jaka sumar ha Umden PHC, ki la hap ban mihnoh ha ka jaka kaba ki trei hapoh katei ka jaka sumar bad kata ka dei tang ba la don ki briew kiba la leit ban byrngem ia ki.
Halor katei ka jingjia ba la mihnoh ki Doktor kiba ju ai jingsumar ia ki paidbah ha katei ka thain, ka Synjuk ki Rangbah Shnong Nongtluh, Mathan bad Marmaiñ Area, ha ryngkat ka jingdon u Bah Mayraldborn Syiem, MLA Nongpoh, nangta ka Dr. Kharduid, DMHO ka Ri-Bhoi District, ki nongtrei ka koit ka khiah, ki ASHA lem bad kiwei, hynnin ka sngi Saitjain, ki la lum da ka jingialang kyrkieh ha phyllaw ka Umden PHC, na bynta ban iamir jingmut lem bad ki paidbah, ki longkmie longkpa, ki nongialam shnong bad ki nongialam sengbhalang ruh kumjuh.
Ka jingphet ki doktor kiba ju sumar ka Umden PHC, ka dei hadien ba la don kawei ka longkmie armet, kaba la shah pynkynriah na Umden PHC sha Nongpoh Civil Hospital shiteng miet, hynrei ha kaba kum katei ka por, la mih ka jingkynnoh ba ki doktor ba shakri ha katei ka jaka ai jingsumar ki khlem ai Ambulance, kaba la pynlong ia u lok jong katei ka longkmie ba un hap shimwai da ka kali shimet bad haba la poi ha Civil Hospital Nongpoh, i khyllung katei ka longkmie I la hap noh ha painkhana.
Katto katne sngi hadien katei ka jingjia, la don ki briew kiba la leit ban byrngem byrsit ia ki doktor kiba trei ha Umden PHC, kaba la pynlong ia ki doktor ba kin tieng, tad haduh ba kin shim ia ka rai ban mih noh na katei ka jaka sumar bad kaba la wanrah jingeh pat ia ki paidbah kiba leit ban shah sumar hapoh katei ka jaka sumar.
Ka jingthmu jong ki Rangbah Shnong, ba ki la pynlong ia katei ka jingialang, ka long ban wanrah biang ka bit ka biang ha ka rukom ai jingsumar hapoh Umden PHC bad nalorkata ban ai ai mynsiem ia ki nongtrei bad ruh ban weng noh ia ka jingeh jong ki paidbah haba ki leit ban shah sumar ha katei ka jaka ai jingsumar.
Lyngba katei ka jingialang, ki la don shibun kiba la ai jingmut, kaba kynthup naduh ki nongialam shnong, ki longkmie longkpa lem bad kiwei, ha kaba ki da angnud eh ban wanrah biang ia ka rukom ai jingsumar kaba bit ba biang ha Umden PHC.
Haba iadei bad ka jingeh kaba la kynduh da ki paidbah, na ka daw ba ki doktor kiba dei ban ai jingsumar ki la mih noh na katei ka jaka, na ka liang u Bah Mayraldborn Syiem kum u MLA, kumjuh ruh na ka liang ka DMHO, ki la ai ka jingkular ban shimkhia halor katei ka kam bad kata ka long ban wanrah ia ka rukom ai jingsumar kaba biang ha Umden PHC.