Nang khlaiñ ka HSPDP, ring sdot ka UDP ha Nongstoiñ

Shillong, 24 Naiwieng:
Na ka resol elek shon shiteng samoi kaba la pynbna mynta ka sngi ha Nongstoiñ konsti twensi, la iohi ba ka seng HSPDP ka la nang khlaiñ nang khlaiñ ha kaba ka vote ba la ioh da u kyrtong jong ka u bah Diosstar Jyndiang uba dei u nongniah kali u Maieid Hoping, ka la khamtam pynban ban ia ka vote kaba u Maieid Hoping u la ioh ha u snem 2013. U bah Dios u la ioh 11,189 vote katba u Maieid Hoping ha u snem 2013 u la ioh 10,931 vote kaba pyni ba u la kham ioh tam shuh shuh sa 258 vote.
Lah ban pynkyn maw ha u 2013 ka UDP ka la ioh 3864 vote bad u kyrtong jong ka ha katei ka snem u dei u bah Nasar Marweiñ, hynrei mynta la iohi ba katei ka seng ka la nang ring swai pynban ha kaba mynta ka kynti u kyrtong jong ka u bah Mosklander Marngar u la ioh tang 1257 vote.
Ka Congress ha u 2013 ka la ioh 8475 vote bad u kyrtong jong ka ha katei ka por u dei u Dr. Adviser Pariong katba mynta pat katei ka seng ka la kham hiar ha kaba u bah Gabriel Wahlang u la ioh duna ia katei ka vote u Dr.Pariong bad u ioh 8425 vote kaba pyni ba ka vote Congress ka jah tang 50 vote, kaba lah ban ong ba ka vote bank jong ka seng Congress ha Nongstoiñ kam pat khih satia.Haba peit ia ka vote ba ka HSPDP bad ka Congress ka la ioh mynta ka kynti, la iohi ba ka vote bank jong kitei ki ar seng ha Nongstoiñ kam khih, wat la ka la don ka jingtam bad ka jingduna hynrei ka long tang mar khyndiat khyndiat haba ia nujor bad u snem 2013.