Na ka dew shrah sha ka pung bah, ka kam radbah ka Laitmawsiang

Ha kaba kum kane ka por jong ka jingtyrkhong um, sha ki kylleng ki shnong ka Ri Khasi, kumta ka nuksa jong ka Laitmawsiang, ka dei ban long ka jingai mynsiem ia ki shnong, kiba mad ia kajuh ka jingeh, lada dei ha ki jaka sor ne khamtam ha ki nongkyndong.

Ka Village Employment Council (VEC) jong ka shnong Laitmawsiang, kaba don tang 200ngut ki nongtrei job card, hynrei, ka lah ban shna ia ka nan kaba heh 11,809 square metre bad ban pyndap um, haduh 2 klur litar antad, ha katei ka nan, ha ka jingjylliew kaba ar metre eiei.
Ka ri Khasi, ka dei ka ri, kaba la kyrkhu kyrpang da u nongbuh nongthaw, namar ba ka don ia ki jaka lum bad ka don ia ki jaka them bad katei kam dei tang ka dur ka dar, hynrei ka don shibun bah ka jingmyntoi ia ka umbam umdih, um sait um khlieng bad wat ia ka jingshit jingkhriat bad kine ki jaka lum jaka them, ki don ia shibun ki tyllong um, kiba ngim ju khein kor satia haduh ha kine ki sngi.

Ha ka jingwan jong ka um sorkar, kum kine ki tyllong um, kiba tuid jai jai, la ju pynjot pynpra noh, na ka por sha ka por; hynrei haba ka la sdang wan biang ka jingkyrduh um, kumta ka la dei ia ki shnong ki thaw, ba kin wad biang ia kito ki tyllong um, ba kin pynlang ia ka umbam umdih, lada dei kaba shi jaw ar jaw ruh, namar ba katei kan lah ban pynduh ia ka jingiap thynrang um jong u briew bad ia kane ka kam, yn nym lah ban aiti ha ka PHE lane ha ka Rural Development, hynrei ka dei ka bynta jong nongshong shnong, lyngba ki komiti kum ka VEC bad sa kiwei de ki komiti, ba kin shimti ban wad bad sumar ia ki tyllong um bad ban pynshlei, kumba ka la jia ha ka shnong Laitmawsiang.

Ka sorkar jylla, ka dei ban ai bor shuh shuh ia ki VEC, da kaba bei pisa kham bun, lada ki don ia ki tyllong um, kiba ki lah ban sumar bad ban pynpoi um sha ki jaka rep ne sha ki shnong bad lada ki don ia katei ka lyngkor, kumta kin dang lah ban thaw ia shibun ki pung um lane ki wah duid, ki ban long ka jing myntoi kaba khraw ia u khun bynriew ha kine ki sngi.
Ka nuksa kaba bha tam, ka long ba ka sorkar kan thaw ia ki komiti pynneh um lane pynneh mariang (preservation of water and environ ment) bad kitei ki komiti, ki donkam palat ban don noh ha ki shnong, kiba don ha syndah U Lum Shyllong, ha syndah U Lum Sohpetbneng, ha kjat U Lum Symper, u Lum Kyllang bad sa shibun bah kiwei pat ki lum bad kitei ki komiti, ki dei ban don ia ka kyndon kaba khlain, ha kaba kim bit ban ailad ia kano kano ka kam pynjot mariang, lada dei ha kaba shna ia ki pung bording, ki ophis, ki madan, ki lynti iaid kjat, ki surok ne kino kino ki jingtei kiba thmu ban pynjot ia ki tyllong um.

Kiba bun ki ri ka pyrthei, kiba don ha ri shyiap, hynrei ki lah ban pynkylla um dih, wat ia ka um duriaw, kumta katno tam ia ngi lei, kiba la kyrkhu da u lapbah, na ka bynta 4,5 bnai kynthih; ba ngim lah ban pyndonkam ia katei ka um jong ka mariang bad ia ki tyllong bapher, kiba don ha ki lum ne ki umpohliew, kiba ju tuid jai jai ban ai ia ka umbam umdih bad ka um sait um khlieng sha ki shnong bapher.