“U Masi lud ba saw tlem”

AIS Suja

U Masi lud ba saw tlem (Red heifer): “Kane ka long ka rukom jong ka hukum ia kaba u Trai u la hukum, u da ong ha u Moses: To kren ha ki khun Israel, ba kin wallam ha me ia ka masi lud ba saw bthuh (red heifer) ba tlem, ha kaba ym don ka jingduna, bad ha kaba ym shym la buh ia ka jwar (lyngkor) mynno mynno ruh ……. Bad u Eleasar un shim na ka snam ……. Un synreit na ka snam jong ka beit shakhmat ka Tabernacle ka jingiaseng hynniew sien” Kitab jingkhein 19:1-4.

Une u masi lud ba saw tlem u dei u jait masi ba ki Israel ki ju pyndonkam naduh ki por hyndai ha ka Testament Barim ha ki por u Moses. Kaei kaba jia mynta?
Ki Israel ha ki hajar snem kim bna shuh ia kiei kiei ruh namar la pynsakma ia ki sha kylleng ka pyrthei. Hynrei naduh u 1948 A.D. ki Israel ki la don ha la ka ri ki la nang ia bun ki kha roi, ki la kiew ha ki liang baroh khamtam eh ha ka juk jingstad science and Technology. Mynta haba ki la roi (develop) nadong shadong, kaba ki donkam pat mynta ka long ban don noh la ka jong ka Temple, namar ki la duh noh ia ka Temple naduh u snem 70 AD, kata 38 snem hadien ba u Jisu u la kiew noh sha bneng ha u lyoh. Ka Temple barim ka don ha Temple Mount ha Jerusalem ha kaba ka don ka Dome of the Rock jong ki Muslim. Hynrei ka por kan poi noh ba ki Jiw ne Israel kin lah ban pynieng pat ia ka Temple kaba Lai jong ki.

Mutdur mynta kita ki masi basaw tlem (red heifer) ki la don ha Jerusalem hynrei ka Temple ban ai jingknia da kita ki masi kam pat don haduh mynta. Dei na kane ka daw ba ki Jiw ki la khih jingmut bha ban ioh noh ka hukum ban pynieng Temple, nano nano uba lah ban ai bor ne ai hukum.
Hangne ngi sngewthuh ba ki Jiw (Israel) kim pat pdiang ia u Jisu kum u Messiah jong ki, ki dang iaid da kata ka hukum u Moses bad ki kham ngeit ha ki hukum u Moses bad ia ka Testament Barim ban pyndep ia ki niam ki rukom jong ki, kim sngewthuh ei ei ka mut aiu ba ki leh lyngba ki niam ki rukom jong ki bad kim pei phang ruh ba kine kiei kiei ki kdew (refer) shaphang u Jisu. Namar uta u masi saw tlem (red heifer) u thew ia u Jisu Khrist, hynrei ki shim beit ba u Blei u dang sngew ia ki da ka jingknia kaba da ki mrad. Hynrei ym shuh kumta.

Sa kawei pat, lada ki Israel kin ioh ban pynieng ia kata ka Temple kaba Lai, hooid kin ioh ban ai jingknia jingainguh, hynrei to tip pat ba ka jingioh jong ki Jiw ban pynieng ia ka Temple Ba Lai, kan long ka por jong kata ka shi taiew kaba sah ban ioh long 70 Taiew. Namar u Blei u la dep kren lyngba u Prophet Daniel da kaba ong – “70 taiew la pynkut halor ki briew jong me” Daniel 9:24. Kaba mynta ngi dang don hapoh ki 69 taiew. Bad lada yn pynieng ia ka Temple kaba Lai jong ki Jiw, kan sdang artat ka shi taiew kaba sah ban long noh 70 taiew. Ka mut kaba kut noh jong kiei kiei kiba ha kane ka pyrthei. Ynda la dap 70 taiew kumba ong u Daniel, u Blei un pynkut noh halor ki Israel bad ia ka pyrthei hi baroh kawei. kumta ka shitaiew kaba sah mynta ka long ka por ha kaba ki Israel kin ioh pynieng Temple, ban ai jingknia da kita ki masi (red heifer) hapoh kata ka Temple, tang lai snem shiteng jong kita ki 7 snem ne jong kata ka shi taiew kaba khadduh. Namar la thoh kumne: “Bad shitaiew un pyllong ka jutang baskhem (Peace Treaty with Israel). Bad hamar ba shiteng kata ka taiew (3 ½ snem) un (Mradkhlaw) pynduh noh ia kata ka jingknia bad jingainguh bam (da kita ki masi kein)” Daniel 9:27. Ki Jiw kin ioh ai jingknia tang 3 ½ snem da kita ki masi batlem. Hynrei kyndit kyndit u Mradkhlaw un pynsangeh noh ia ki ban ai jingknia ha kata ka Temple Ba Lai. Un wan u jingijli uba pynjot kaba thew ia u soitan Lucifer u da wan rung ha u briew u Nongsynshar uba long thik kum u Adolf Hitler, u nongshun bah ki Jiw. Une un pynjot kein ia ki Israel ha kata ka por bad ia ka pyrthei hi baroh kawei da kaba un shong hapoh kata ka Temple ha Jerusalem ban leh ialade kum u Blei, hynrei u dei u briew jong ka pop. 2 Thessoloni 2:1-4.

Kumta haba ngi peit ia ki dak ka por, kita kiei kiei ki long hajan, namar ki Israel ki la don lut ki jingdonkam baroh ha kaba pynkhreh ban pynieng pat ia ka Temple kaba Lai ha Jerusalem. Khamtam eh ba ki la don kita ki masi lud basaw tlem hapoh (farm) ha Jerusalem. Kane hi ka pyni sha ka pyrthei ba ki por ka jingjynjar bah ka don hajan na ka bynta ki Israel bad ia ka pyrthei baroh kawei.
Ka por ban pynieng pat ia ka Temple ha Jerusalem kan long ka por ba jynjar tam ba kordit tam. Naba hangta ka kordit bah kan long kaba ym pat ju long na myndang long ka pyrthei haduh mynta, bad kan ym long shuh ruh” Mathaios 24:21.

To ngin tip ba duna 2000 snem mynta, naduh 70 AD haduh mynta, ba ki Jiw (Israel) kim don Temple shuh ban ai jingknia ia u Blei, hynrei tang ha ki kynroh ha Jerusalem. Ka por shisha ka la dei ia ki Jiw ban ioh noh, bad ba ki por jingjynjar tam ruh ki la nang jan, bad ka por kaba kut kiei kiei kiba ha ka pyrthei ruh ki la nang jan, tad ynda ki Jiw kin tip bad pdiang ba u Jisu u dei u Messiah jong ki ia uba ki ap khmih lynti. Bad ia kata kin sa sdang ban sngewthuh tad ynda un (Mradkhlaw) pynsangeh noh ia kata ka jingknia jong ki ha kata ka Temple Balai tang shu kut lai snem shiteng. Daniel 9:27.
Na kata ka daw: “Suk uta uba pule kita kiba iohsngew ia ki ktien jong kane ka jingiathuhlypa, kiba sumar ia kita kiei kiei ruh IA KIBA LA THOH HA KA, namar ba kata ka ia ka la jan” Jingpynpaw 1:3. Amen.