Nongpoh, 16 Risaw: Kawei na Bos Night Super kaba don ia u number ML-05-L-8998 ka la
kylla kynsan ha surokbah NH-6 bad kaba hap ha ki bynta ka khlaw Umling ha Ri Bhoi.
Katei ka jingjia, ka la jia hynne ka step ha ka por 7:30 baje eiei mynstep, ha kaba katei
ka Bos Night Super kaba dei kaba wan ha Silchar da ka jingthmu ban hiar sha Guwahati, hynrei
haba la poi ha katei ka jaka, ka la kylla kynsan ha surok bad kaba la wanrah ia ka jingmynsaw
ia kiba bun ngut kiba shong hapoh katei ka bos Night Super.
Ia kitei ki briew kiba shong hapoh katei ka bos Night Super bad kiba la mynsaw, la pynkit
noh mar mar sha Nongpoh Civil Hospital bad ha Bethany Hospital, na bynta ban ioh ia ka
jingsumar.
Ki briew kiba shong hapoh katei ka bos Night Super, ki la ong ba ka daw kaba la pynlong
ia katei ka bos Night Super ba kan kylla, ka dei namar ba u nongniah u la pynher stet palat,
kaba la pynlong syndon ia katei ka bos ba kan kylla syndon ha katei ka jaka.
Kitei kiba shong hapoh katei ka bos, ki la iathuh ruh ba ki la suba ba u nongniah jong
katei ka bos u dei uba la buaid kyiad, ha kaba tang mar ia jia katei ka jingjia ba kylla, u la phet
krad noh ialade na katei ka jaka.
Ha katei ka jingjia, kam shym la don kano kano ka jingjia ba sngewsih, lait noh tang kiba
mynsaw, namar ba katei ka bos kaba thmu ban hiar sha Guwahati, ka la leit kylla sha ka liang
ban kiew sha Shillong bad kaba la wanrah ruh ia ka jingdheng kali kaba la neh kumba katto
katne kynta.
Phi don ban ong eiei?