Ktha khlieh ka sorkar ba hap sei 5percent man u snem, ia ka tulop ki babu SSA, ong U Rakkam

Shillong:U myntri ka tnad pule puthi ka jylla u Rakkam S Sangma ula pynpaw ia ka jingsngew khia jur halor ka jingpyntreikam ka sorkar India ban phah sei 5 percent na ka pla ka sorkar jylla man u snem ban siew ia ka tulop ia ki nonghikai skul SSA.

Ha ka jingshisha, ka sorkar India ka ju bei pisa 90 percent bad 10 percent yn hap sei hi ka sorkar jylla na pla lajong. Hynrei naduh ka snem 2018, ka sorkar India ka la wanrah ia ka jingkylla, ha kaba ka la pynhiar ia ka jingbei pisa sha ka 5 percent man u snem bad mynta ka snem, ka sorkar India ka bei pisa tang 70 percent katba 30 percent hap sei ka jylla bad lashem snem, ka sorkar India kan bei tang 65 percent bad ka sorkar jylla kan hap sei 35 percent bad kane kan iaid ter ter man u snem.

Kane ka jingpynkylla ka sorkar India ia ka rukom pyniaid, ka la buh jingeh ia ka sorkar jylla khamtam kane ka jylla kaba duna ka jingmih bad kaba la shu shaniah ban ioh pisa na ka sorkar pdeng. Ki don 13000 ngut eiei ki nonghikai skul SSA bad 10,000 hajar ngut eiei ki nonghikai Adhoc kiba dawa pynkiew tulop, ka la pynktha khlieh ia ka sorkar jylla kumno ban pynbeit ia kane ka jingeh jong ki nonghikai.
U myntri u la ong ba ka sorkar ka dang bishar kumno ban leh ia ki nonghikai namar watla ka jingdawa jongki, ka long kaba shongnia hynrei ka shem jingeh namar ka pisa ka sdot.