“Ka Atiar ialeh thma u Blei”

AIS Suja

Ka Israel ka long ka Atiar ialeh thma jong u Blei. Ong u Blei – “Pha (Israel) long u sdie iapom bad ki atiar ialeh thma jong Nga: Bad da pha Ngan pynlwet ia ki jaid bynriew, bad da pha Ngan pynjot ia ki hima ……. Bad da pha Ngan pynlwet ia ki Nongsynshar bad ia ki deputy” Jeremaiah 51:20-23. Nangne bad shakhmat, ka pyrthei kan tip bad iohi ba ki Israel ki long shisha kata ka atiar ialeh thma jong u Blei. Dei na kane ka daw ba u Blei ki Israel u la lum pat ia ka jaidbynriew Israel na kylleng sawdong ka pyrthei ban don pat ha ri Israel mynta. “To sngew ia ka ktien u Trai phi ki jaidbynriew, ban pynpaw ia ka ha ki dewlynnong kiba jngai: bad to ong ia uta uba la pynsakma ia u Israel un lum pat ia u, kumba u nongap langbrot u leh ia la ka kynhun bad u pyllait ia u na ka kti uta uba kham khlain ia u (na ka kti u Mradkhlaw) Jeremaiah 31:10-11. “Ha ki sngi ban wan u Jakob un suh thied; u Israel un phuh bad un shylluid: te kin pyndap ia ka khmat ka pyrthei da u soh” Isaiah 27:6. Thik ka la long kumta naduh u 1948 A.D. “U shyiap uba shit phyrnai un long ka pung, bad ka khyndew kaba thrang um, kan long ki umpohliew; ha ki jaka shong ki myrsiang ha kaba ki dem yn long u phlang lem bad u khah u sder” Isaiah 35:7. Shibun bah ki jingiathuhlypa la dep pynurlong ha kaba iadei ia ka jingwanphai pat ki Jiw ne khun Israel sha la ka jong ka ri Israel.

Mynta pat ka pyrthei, kan iohi ba ka Israel ka long shisha ka tiar thma ne atiar ka jong u Blei pyrshah ia ki Jentil kiba shun kiba hiar thma ia ka, ki kynhun kieng atiar jong ka Middle East kum ka Hesbolah bad kiwei kiba kwah ban pynduh jait ia ka jaidbynriew Jiw nangne na sla pyrthei. Ka thma hapdeng ka Israel kam pat kut tang kumba ngi iohi mynta hynrei kaba khraw ka don shakhmat tad ynda ki ri ki hima ka pyrthei baroh kin hiar thma ia ka Jerusalem ha Israel. Dei hangta u Blei un ieng ban ialeh na ka bynta ki Israel namar ba u long u Blei u bym klet ia la ka jutang hapdeng u Abraham da kaba u ong – “Ngan kyrkhu ia kita kiba kyrkhu ia me bad Ngan tim ia uta uba tim ia me” Jenesis 12:3.

Kiba thmu ban pynjot ia ka Jerusalem ka Nongbah ka ri Israel u Blei u la maham lypa ia ki da kaba ong- “Ha khmih, Ngan pyllong ia ka Jerusalem, ka khuri pynshad lyngwit ha ki paidbah baroh kiba baroh sawdong, bad halor ki Judah ruh kan long ha kata ka jingkerkut ia ka Jerusalem. Te kan jia ha kata ka sng, ba Ngan Pyllong ia ka Jerusalem U MAW BAKHIA ia ki paidbah baroh; baroh kiba pynkit ia ka ha ki yn pynmong sat ia ki: bad ki jaidbynriew baroh ka khyndew KIN IALUM LANG PYRSHAH IA KA. Ha kata ka sngi NGAN SHOH IA U KULAI DA KA JINGLYNGNGOH, bad u nongshong jong u da ka JINGLAMWIR” Sekharaiah 12:2-4. Kane ka bynta kan jia ha ki por ban wan tad ynda ki Syiem na shatei (Farther North) kum ka Russia, Turkey bad kiwei kin wan hiar thma ha Jerusalem ha Israel. U Blei un pyndep ia ka kular halor ki khun Israel tad ynda ki Israel kin tip bad kin pdiang ba u Jisu u dei u Messiah jong ki, u Syiem ki Jiw kein, bad u Syiem ki Syiem, u Trai ki Trai.

Ngi iohi haduh mynta ki Jentil ki thmu ban pynduh jait ia ka jaidbynriew Jiw ne Israel hynrei kim lah hynrei ki shu khih bitar man ka por. “Balei ba ki jaidbynriew ki ia bitar lep, bad ki kynja bynriew ki ia pyrkhat ia kaba thala? Ki Syiem ka pyrthei ki ia ieng, bad ki Nongsynshar ki iasylla lang pyrshah ia u Trai bad pyrshah ia uba la sleh jong u, ki ia ong – To ngin ia bthat noh ia ki jingkhum jong ki, bad ngin bret noh ma ngi ia ki saikhum jong ki. Hynrei, uta uba shong ha ki bneng un rkhie: u Trai un rkhie bein ia ki” Salm 2:1-4.
U Blei mynta ruh u rkhie bein ia kito ki jaidbynriew ki ri ki hima kiba hiar thma ha Israel namar kim tip kaei ka mon u Blei, hynrei kim pat pat ba u Blei u la pyllong ia ki Israel kum ka atiar ialeh thma jong u ha kine ki sngi kiba khadduh. U soitan u trei ha ki jaidbynriew, ki ri ki hima ban isih jaidbynriew Jiw namar u tip biang biang ba ka jingpynim ia ka pyrthei ka long na ka jaidbynriew Jiw. U Jisu u ong ia kata – “Naba ka jingpynim ka long na ki Jiw, Salvation is from the Jews” Ioanis 4:22.

Katba u soitan u dang kynshoit ia ki ri ki hima pyrthei namar u tip ba u la jan kut ka por jong u, u Blei pat u pyndonkam ia ka Israel kum ka atiar ialeh thma jong u hangne ha pyrthei. Hynrei lada ki ialeh thma katno katno ruh, kane ka jaidbynrew Jiw kan ym jah satia nangne na pyrthei tad ynda u Blei u la pyndep ia kiei kiei baroh. U Jisu u kren shai da kaba ong – “Kane ka pateng bynriew (Jiw) kan ym leit noh, tad ynda la pyndep noh ia kine kiei kiei baroh” Mathaios 24:34. Na kata ka daw ka jaidbynriew Jiw ne Israel kan hap long shwa ka atiar ialeh thma jong u Blei mynta bad ka ban sa wan. Bad na ka bynta ka daw jong ki thma, u Blei u ong ba kiba ngeit baroh ki dei ban duwai na ka bynta ka Jingsuk ka Jerusalem. “TO DUWAI NA KA BYNTA KA JINGSUK KA JERUSALEM” Salm 122:6.