Pynsangeh ka KSU NKH ia ka jingpynrung Aadhar

Nongpoh, 22 Naiwieng:
Ka KSU North Khasi Hills District (NHKD) ka la pynsangeh ia ka jingpynrung ia u Aadhar number ha shnong ha shnong Umtyrnga, Ri Bhoi District.
U Vice President ka KSU NKH u Bah Vincent Makri u la ong ba ka seng ka la pynsangeh noh ia ka jingpynrung kyrteng ia u Aadhar number ha shnong Umtyrnga kaba don kumba 200 ngut tam ki briew kiba thmu ban pynrung kyrteng NPR (aadhar number) da ka bor synshar district ha kane ka sngi Thohdieng.
U Bah Makri u la ong ba ki bor district ka dei ban ai jingshai ym ban pynrung kyrteng Aadhar lane ka NPR. U la ong ba ka seng ka la pyrshah jur ia kane ka NPR hapoh ka Ri Bhoi District namar ka jingbym pynshai paidbah halor ka jingmut bad ka jingthmu jong kane ka NPR lyngba ka ADHAAR card.
“Ka jingpynrung kyrteng ki nongtrei ka tnat Survey kim shym la wad ia ka jingshisha ia ki briew la ki dei ne em ki trai ri trai muluk jong ka jylla Meghalaya hynrei la shu pynrung kyrteng pathar kaba long ka jingma ia kane ka jylla” u la ong.
U la ong ba ki briew na DC ophis ki la pdiang tang shu pyni tang da ka Epic bad Driving Licence bad kane kan buh ruh ia ka jingma namar ba ki bar jylla kin ioh ban rung kyrthep khlem kano kano ka jingpynshisha kaba tikna ia ka jinglong trai ri trai muluk.
Ka KSU kan sa leit iakynduh ia ka DC Ri Bhoi, ban iakren halor ka jingtreikam jong ka Adhar Card, khnang ba kan nym wanrah ia ka jingsngewthuh bakla ia ki paidbah, u la ong.