Pyrshah ka Laitumkhrah ba pynkiew bai khajna

Shillong, 22 Naiwieng:
Ka Executive Dorbar jong ka Laitum khrah Dorbar Shnong Pyllun kaba la long kyrkieh ha ka 21 tarik u Naiwieng ka la rai pyrshah jur halor ka jingpyrshang jong ka sorkar lyngba ka tnad Shillong Municipal Board (SMB) ban pynkiew ia ka bai khrong khajna khajna naduh u snem 2016 . Ka kyrwoh khubor na ki 3 ngut ki Rangbah Shnong ka Laitumkhrah ba kynthup ia u bah T.P Nongrum,bah GB Sawkmie bad u bah S.B Nongdhar ka la ong ba tang ka khajna ba ka Municipal ka lummynta ruh ka la heh lypa hynrei ka dang mut ban pynkiew shuh shuh pynban katba ki kam jong ka bad ka khajna ba ka lum pat kam don jingiahap haei haei ruh.
Katei ka kyrwoh ka la ong ruh ba ka jingpynmih khubor u CEO ka SMSban pynlong ia ka jingialang paidbah ha ka 24 bad 25 tarik u naiwieng 2015 ha Soso Tham Auditorium ka dei tang ka jingpynthame ia u paidbah ban buhrieh ia ki jingtorti bad ban leh bym suidniew ia ki jingeh ba don lypa kiba u paidbah u kynduh.
Katei ka kyrwoh khubor ka la ong ruh ba ka SMS ka la dkoh lypa ha ka ban pynbiang ia ka umbam umdih, ban pynshai ia ki lynti ki surok, ban lum niut, ban maramot ia ki jingtei paidbah ban ban sumar ia ki iew ki hat kiba hap hapoh ka jingpeit jong ka. Ka la ong ba kam sngew iahap ia katei ka jingthmu pynkiew dor ia ka khajna haba ki kam ka SMB kim iahap eiei. Ka Dorbar Pyllun ka Laitumkhrah ka la bthah ia baroh ki nongsiew khajna jong ka shnong Laitumkhrah ba ki dei ban leit buh ia ki jingpyrshah halor ka jingthmu jong katei ka ophis ban pynkiew biang ia ka khajna ha ka 24 Naiwieng 2015 por 10:30 mynstep ha Soso Tham Auditorium, Shillong.