Nongpoh, 08 Risaw: U Bah Sosthenes Sohtun, MLA Jirang, mynta ka sngi u la leit ban jurip ia ki 5 tylli ki longiing Khasi kiba don ha shnong Nongspung-B bad kiba la shah ktah eh, na ka jingtuid ka khyndew hapoh ki iing ki sem jong ki bad kata ka dei na ka jingwan tuid ka khyndew kaba la tih kaba la tih da uwei u briew uba dei na ka jaidbynriew Naga.
Na ki 5 tylli ki longiing kiba la shah ktah, kaba la kham palat ka dei ia ka iing jong ka Kong Premika Sungoh, kaba la hap ban mih noh na la iing ha ryngkat ki khun, namar ka iing kaba ki shong ki sah, ka la shah tap ha u khyndew, uba la wan tuid na ka jaka tih khyndew jong u Naga.
Kiwei pat ki longiing kiba la shah ktah, ki dei ka iing jong ka Lijanta Sungoh, Kerning Sungoh, ka Kong Manar Suting bad ka iing jong ka Kong Wompher Dhar.
Lyngba jong katei ka sngi, ba utei u MLA u la leit ban jurip hi ia kitei ki longiing kiba la shah ktah, u la kular ia ki ba un pynioh ia ki lad jingiarap na ki bor sorkar bad kata ka long ba un pynkren sha ophis u Deputy Commissioner bad ruh sha ophis u BDO Umling Block, khnang ba kitei ki longiing kin ioh ia ka jingiarap kaba kham kloi.
Haba iadei bad ka jingshah ktah kitei ki longiing, na ka liang u MLA u la pynpaw ia ka jingsngewkhia bad uba la pynpaw ruh ba kiba kum kitei ki jingjia kim dei shuh ban jia nangne shakhmat bad kata ka dei tang namar ka jingtih khyndew beain bad khlem pyrkhat da utei u briew, uba dei na ka jaid bynriew Naga.
Ha katei ka sngi, ba u la leit ban jurip, u MLA Jirang, u la noh synniang ruh da ka pisa sha kitei ki longiing, kiba la long kum lanot na ka jingtuid khyndew hapoh ka iing jong ki.
Phi don ban ong eiei?