Nga la ïeng rangbah halor ka RP naduh ba nga dang long marwei, ong u bah Adelbert

Shillong:U MLA ka VPP na North Shillong, u Bah Adelbert Nongrum u la ong ba ka jingpynbeit thymmai ia ka aiñ bham kam lane ka reservation policy ka dei kaba u la ïeng rangbah naduh ba u long MLA marwei na KHNAM, bad mynta u la ioh bad buddien bad ka VPP.

Hadien ba u la wan ban ai jingmut sha ka expert committee mynhynnin ka sngi Saitjaiñ, u Bah Adelbert u la ong ba ka expert committee kam lah ban treikam palat, lait tang ban shim ia ki jingai jingmut ha kaba iadei bad ka bhah ha ka thungkam thungjam hapoh ka Jylla.
U la ong ba u la pyni ia ki jingduna, ki jingdkoh bad ki jingbym shong aiñ jong ka bhah kam katkum ka regulation 1972.
U la ong ba napdeng kiba long trai shnong Khasi, Jaintia bad Garo dei ban ai kyllum lang beit 80 percent.
Ha kaba iadei bad ka Roster System, u Bah Adelbert u la iathuh ba u la pynsngew hakhmat ki dkhot ka expert committee ba ka long ka bym iahap satia namar ka ia takhuh bad ka resolution jong u snem 1972. U la ong shuh shuh ba katkum ka jingpynsngew jong ka High Court, la kdew ba ia ka Jylla ka khlem pyntreikam ia ka Roster System naduh u snem 1972.

U Bah Adelbert u la pynpaw ka jingpyrshah hakhmat ka expert committee ban pyntreikam ia ka Roster System na shadien lane ban kheiñ naduh u snem 1972, hynrei u la ong ba dei ban pyntreikam ia ka roster nangne shakhmat ym ban phaidien.