Ka jaka ba tih khyndew beain u Naga ha Nongspung-B, ka dei ba u la thied na u Khasi

Nongpoh, 06 Risaw: Ka jaka ba uwei u briew na ka jaid bynriew Naga uba la tip kum u Donalad Srinate bad uba la thied ia kawei ka jaka ha shnong Nongspung-B, ka dei kaba u la thied na uwei u Khasi, hynrei um dei u briew uba shong ba sah ha shnong Nongspung-B, ka shnong kaba hap ha Raid Marwet, Ri Bhoi.

Katei ka kam ba thied jaka utei u Naga ha katei ka shnong, ka la paw pyrthei hadien ba la don ki 5 tylli ki longiing Khasi kiba sah ha shnong Nongspung-B, ha kaba ki ïing ki sem jong ki, ki la shah ktah eh, namar ka khyndew kaba la tuid na ka jaka ba pyntih khyndew beain da utei u briew uba dei u Naga.

Baroh kitei ki longiing kiba la shah ktah, tang namar ka jingtih khyndew beain da utei u Naga, ki dei ki ïing kiba dei na ka jait Sungoh, ha kaba ka jingshah ktah ki ïing ki sem jong ki, ka sdang ban jia mynta ka Lyiur, namar ba utei u Naga u la sdang ia ka kam ban tih khyndew ha ki Bnai Tlang jong u snem ba la dep.

Haba iadei bad ka jingshah ktah kitei ki longiing, haba kylli kiei ki lad ba ki la shim, ha kaba ki la ïathuh ba ki ujor ruh sha Pillangkata Police Outpost, hynrei haba ki Pulit ki la khot ia utei u briew ban iakren bad kitei ki lanot, ka jubab na utei u Naga ka long ba u pyneh beit ia ka jingdawa jong ban siew pisa ia ka jingjulor, hynrei ka jubab kaba u ai ka long ban pynkhuid tang ia katei ka khyndew kaba la tuid na ka jaka kaba u tih khyndew.

“Shano hi un lah ban pynkhuid ia ka khyndew kaba la tuid na katei ka jaka kaba u tih, namar ka dei ka jaka kaba don sha ki kynjang lum, hynrei ki ïing jong kitei ki Khasi ki dei kiba don ha them, kumta katei ka khyndew kaba bun bad kaba la tuid, ka la pynsahkut lut ia ki nala bad hadien kata ka khyndew ka rung sha ki ïing ki sem, khamtam eh ha ka por ba hap slap” ong kawei ka lanot ba shah ktah ka iing.

Kumba ka long mynta, ngi la shah lehsat shisha bad ngi la sohsat haba nginshong ngi sah ha la iing la sem, namar tang shu hap slap, ngim nang shuh ban iohthiah ba ngi hap beit ban ap ïoh kumno kumno ka wan tuid khyndew sha iing bad haba wan tuid ka khyndew ha iing, ngi hap ban pynkhuid beit dalade ha ryngkat ka jingiarap ki briew shnong, ong kitei ki lanot ba shah ktah.

Haba ïathuh ia ki jingeh sha ki lad pathaikhubor, kitei ki lanot ki la ong ba nalor ba ki la mad ia ka jingshah ktah ia ki ïing ki sem, hynrei nalorkata wat ki dieng kwai bad ba ki thung tympew ba ki ju ïoh 1 hajar ne 2 hajar sha ka shi bnai, hynrei mynta ki la duh lut ia kita baroh bad kata ka dei tang na kaba ki la shah ktah eh na ka khyndew kaba la tuid na ka kam tih khyndew beain da utei u Naga.

Ka jingkren na kitei ki longiing bad kibaa long kum ki lanot, ki la kyntu ia ki briew sorkar bad ruh ia ki kynhun sengbhalang, ba kin kren lem ia katei ka jingeh kaba ki Shem, namar naduh mynshwa ki im beit ha ka suk ka sain, hynrei mynta pat naduh la tih khyndew da utei u Naga, ka la pynjynjar ia kitei ki longiing bad ia ka shnong ka thaw hi baroh kawei.