“Kaei ka jingijli ba pynjot?”

AIS Suja

Kaei ka Jingijli Bapynjot? Ka jingijli ka pynjot (Abomination of desolation), ka thew ia uta u jingijli uba long u Mradkhlaw ha ka dur u briew ia uba u soitan u pyndonkam ban pynjot ia ka Israel ia ka jaid bynriew Jiw bad ia ka pyrthei hi baroh kawei.

Ha u Daniel la ong kumne: “Bad naduh ka por ba yn shim noh ia kata ka Jingainguh thang kaba barabor, bad ba yn pynieng ia kata ka jingijli kaba pynjot (Abomination of desolation) kan long 1290 sngi” Daniel 12:11. Kaba mut ba une u Mradkhlaw yn pynsangeh shwa ia ka jingleh niam ki Jiw mar ia kut ki lai snem shiteng kaba Nyngkong. “Bad hamar kaba shiteng kata ka Taiew (Shiteng ki 7 snem) un (Mradkhlaw) pynduh (pynsangeh) ia kata ka jingknia bad jingainguh bam” Daniel 9:27. Ki Jiw kin ai jingknia da ki masi saw bthuh (red heifers). Kaba mut mar ia kut ki lai snem shiteng ba Nyngkong un pynsangeh noh, ia kata ka jingknia ne jingainguh bam ne jingainguh thang, namar ki Jiw ki pyndonkam da kaba syang ia ka doh masi (red heifers) ha kata ka temple. Mar ia pynsangeh, yn pynieng pat ia kata ka jingijli kaba pynjot. Kaba mut ba une u Mradkhlaw un shong ma u pat ha kata ka Temple bad leh ialade kum u Blei ……. Ba yn ioh pynpaw noh ia uta u briew ka pop (Mradkhlaw) u khun ka jingjot uba ialeh pyrshah uba pynsarong ialade ……. Kat haduh ba u shong ha kata ka temple u da leh Blei ialade” 2 Thessoloni 2:3-4. U da leh Blei ialade, u da leh Messiah ruh ialade namar ki Israel naduh kaba sdang jong kita ki 7 snem ne kita ki 4 snem shiteng kaba Nyngkong, ki la dep iateh jutang bad u Mradkhlaw da kaba ki ong – “Ngi la pyllong ka jutang bad ka jingiap, bad ka dujok ruh ngi don jingiakut” Isaiah 28:15. “Te ka jutang jong phi bad ka jingiap yn pyndam noh, ka jingiakut jong phi bad ka dujok kan ym neh” Isaiah 28:18. Kaba mut kan wan shwa ka jingsympat ba shlei ba shyrkhei ia ki Israel hapoh ki 1290 sngi ba la ong da u Daniel. Isaiah 28:18 / Daniel 12:11. Kaba mut hapoh ki 1260 sngi + 30 sngi = 1290 sngi ne 42 bnai bad 30 sngi. ia kaba ka Bible ka ong ki sngi jingjynjar u Jakob. Kaba mut ka por ban wallam noh ia ki Israel sha u Trai u Blei. Ha kata ka por ki Israel kin khot ia u Blei. U Blei u ong – “Te phin long ki briew jong Nga bad Nga ngan long u Blei jong phi” Jeremaiah 30:22. Ki Israel kin ong – “Ale ngin ia phai sha u Trai. Namar u la tar, te un pynkhiah ia ngi, u la shoh bad un sop spain ia ngi” Hosia 6:1-2.

Halor kane ka bynta, u Jisu u pynkynmaw da kaba ong – “Namar kata ynda phin iohi ia ka jingijli Bapynduh (Abomination of Desolation) ba la ong shaphang jong ka da u Daniel Nong iathuhlypa, BA KA DA IENG HA KA JAKA BAKHUID (Standing in the holy place in Jerusalem)” Mathaios 24:15 kaba thew ia kata ka jingijli, kaba mut u Mradkhlaw un shong ha kata ka Temple kaba Lai ha Jerusalem, un leh ialade kum u Blei “……. Naba hangta (ha kata ka por) ka kordit bah kan long, kat kaba ym pat ju long naduh myndang long ka pyrthei haduh mynta em, lymne kan ym long shuh ruh” Mathaios 24:16-21. Kane ka dei kata ka por jingsynshar u Mradkhlaw. “Te lymda pyndkut ia kita ki sngi, kan ym lait im kawei ka doh” Mathaios 24:22. Kane ka thew ia ki Israel. Namar ia kito kiba ngeit kiba la sait khuid ia ki jainkup ha ka snam u khun langbrot, la dep rong noh shwa kane ka por jingjynjar bah. U Blei u hap ban pynlyngkot ia ka por Jingjynjarbah, kata tang 1290 sngi ba la ong da u Daniel 12:11. Kane ka jingpynlyngkot ruh ka dei ba don kito kiba u Blei u la dep jied ki 1,44,000 ngut ki Israel. Mathaios 24:22. Ka por ban pynieng ia kata ka Temple ba lai ka long hajan ha ka jingpeit briew, hynrei ka shong pat ha ka por bad ka bor jong u Blei ban shah ia kata “Namar ka jingstad bad ka bor ki long ki jong U” Daniel 2:20. Namar kata – “Suk uta uba pule, bad kita kiba iohsngew ia ki ktien jong kane ka jingiathuhlypa ……. kata ka ia ka long hajan” Jingpynpaw 1:3.