“Ka Bolivia ka iasyriem bad ka Dong Mihngi”

Shillong, 20 Naiwieng:
U Ambassador ka ri Bolivia sha India u Jorge Cardenas u la ong ba ka ri jongu ka la iasyriem bad kane ka dong mihngi ka India ha ka liang ka spah mariang.
Haba kren mynta ka sngi, ha ka jingiakynduh bad u vice chancellor ka NEHU u Prof KS Srivastava, ki samla pule bad ki nonghikai kane ka skulbah, u Cardenas u la ong ba ka ri jong u ka don ka jingiasyriem bad kane ka dong mihngi ka India ha ka liang ka jingriew spah ha ka mariang, ka jingdon ki kolshor bad ki mrad ki mreng.U la ong ba kumno ki briew kane ka dong mihngi kiba don kumba 60 percent ki nongshong shnong ki la lah ban peit ia ka spah mariang ban kyntiew ia ka ioh ka kot jong ka ri India bad ban pynduna ia ka jingduk 42 percent sha ka 18 percent.
U la ban jur ia ka jingdonkam ban weng noh ia ka jingmut jingpyrkhat jong ka jingshah teh mraw khnang ban kiew kumba long kiwei ki ri ba khraw bor.Ia u Cardenas la synran lang u Ike Sinha u Country Director ka Unite 4 Good ha India.U la ban jur ia ka jingdonkam ban pynbha ia ka rukom pule puthi khnang ban long ka spah ia ka imlang sahlang. “Kane ka dei ka khubor jong nga ban iakren iamir jingmut bad ki briew ha kylleng ka pyrthei”, u la ong.U Sinha pat u la pynkynmaw ia ka jingoh synniang jong u president barim ka ri u  Dr APJ Kalam ia kane ka dong mihngi. U la ong ba ka jingioh u Ambassador ban plie ia ka kper kynbat dawai kaba ai kyrteng ka Dr APJ Kalam Memorial Herbal Garden hajan Pynursla ka long kaba biang eh.