U prah dei u sengbhalang, u pynheh iew ba la jan poi pisa, ong u CEM JHADC

Shillong:U Chief Executive Member (CEM) ka Jaintia Hills Autonomous District Council (JHADC) u bah Thombor Shiwat ula ong ba ka jingwan kyrha ki dkhot ka seng Prah ne ka Voice of the People Party (VPP) ka dei tang ka buit ban pynpaw nam ialade.

U CEM ka JHADC ula kren ia kane halor ka jingkylli ia ka jingsahkut ka tulop ki nongtrei ka JHADC ha kaba ka seng VPP ka la pyllong ruh ia ka jingiakhih hakhmat ophis ka JHADC dang shen ban dawa pyllait ia ka tulop ki nongtrei.
U bah Thombor u la ong ba ka VPP kam dei ka seng sain pyrthei hynrei ka dei ka seng bhalang bad ka jingwan kyrha jongki kam myntoi eiei namar ba lada don pisa ka Council ka siew ia ka tulop bad lada kam don pisa ka Council kam lah leh eiei lada ki wan kyrha man ka sngi ruh.

“Lada ngi don ka pisa, ngi siew beit bad lada kam don, ngim lah leh eiei lada ki (VPP) ki wan kyrha man ka sngi ruh”, la ong u CEM ka JHADC.
U la ong ba ka sorkar jylla ka la pynkhreh shait shaid ban pyllait ia ka bhah jong ka Council bad mynta hadien ba kila ioh jingtip ba ka pisa ka la jan poi ki wan ban halla briew khnang ban ioh burom ban kam ba dei ba leh maki, bad ka long kumba ki wan sma bha.

“Kine ki Prah imat ki don jingtip ki sma, namar haba ka pisa ka la jan poi na ka sorkar jylla, ki wan kyrha khnang ban shim kabu hakhmat u paidbah ban kam ba dei ma ki, kiba pynioh”, la ther u bah Thombor.
U la ong ba kane ka dei tang ka buit jongki namar ba ka la jan ka elekshon bad ki wan leh khnang ban shim kabu. U la ong ba ka tulop kaba sah ban siew ka long 7 bnai bad kumba 6 klur eiei ha ka shi bnai. U CEM ula ong ba ka sorkar kan pyllait pisa kumba T.17 klur eiei.
U la ong ba ka jingbym ioh tulop kam dei tang ia ki nongtrei hynrei ki MDC baroh kim ioh tulop.