Kurup biang ki pulit ia ki mar tuh na Saw Furlong, bad kawei ka kali na Imphal

Shillong:Ki pulit ka nongbah Shillong, ha ka miet jong ka Sngi u Blei, kila ioh ban kurup ia ki tiar tuh ha kaba iadei bad ka case kaba la rejistar Case hapoh Rynjah Police Station.

Ia kitei ki tiar tuh la lap na Saw Furlong bad ki pulit jong ka Nongmensong Outpost kila leit mardor sha katei ka jaka ba don kitei ki tiar tuh.
Katkum ka kyrwoh na u Superintendent of Police ka East Khasi Hills, u Bah Sylvester Nongtnger la ong ba ha ka jingtohkit ha Saw Furlong, ki Pulit kila lap ia kawei ka trok 6 shaka kaba don ia u number AS01CC 3985 kaba la thep lang bad ki mar jot kiba dei ki tiartuh.

Ki tiar kiba la ioh ban kurup ki kynthup 10 unit ki Beam Web Assembly, 32 Unit ki Shuttering Jack, kawei ka mobile phone bad ka sim card.
U la iathuh ba ki pulit ki la kurup ruh iaka taksi kamai kaba don ia u number ML 05K 7554 ha kaba iadei bad katei kajuh ka case.
U SP ula pyntip ba ha kawei pat ka case ba la ujor ha Sadar Police Station, la ioh ban kurup noh ia kawei ka kali na Imphal, Manipur.

Katei ka jingjia kala mih lyngba ka jingujor ejahar pyrshah ia u Mohammad Fareed, uba shong ha Barapathar Mawbah, Shillong ha kaba u nongujor ula kynnoh ba u Fareed ula pynbor iau ban long u ‘Guarantor’ ne Nongbahkhlieh haka jingthied ia ka kali Maruti Suzuki Eeco 5 STR, khlem da pynpaw ba ia katei ka kali yn shim ha ka kyrteng jong utei u nongujor kaba la pynlong ia u ban hap ban siew ia ka ram.
Lyngba ka jingtohkit kaba khlem shongthait, la lapksai ia katei ka kali bad la wanrah noh biang ia ka sha nongbah Shillong.