Iakhaid ka Meghalaya bad Arunachal Pradesh, jop ka Nagaland ia ka Mizoram ha ka Cricket ka NECDC ha Pahamsning, Nongkhrah

Nongpoh, 30 Nailur: Haba sdang ka 1st Senior Women’s Interstate Friendship T-20 Tournament jong ka North East Cricket Development Council (NECDC), kaba ki la pynlong ha madan ialehkai Cricket ka Ri Bhoi District Cricket Association (RBDCA) ha Pahamsning, Nongkhrah, ka jingialehkai hapdeng ki thei ka Meghalaya pyrshah ia ka Arunachal Pradesh, ka la kut ha ka jingiakhaid kaba mar 78 ron, katba ha ka jingiakhun kaba bud, ka Nagaland ka la lah ban pynliem noh ia ka Mizoram da 5 wicket.
Ia katei ka Lympung ialehkai ki kynthei, la pyniaid da ka Meghalaya Cricket Association bad kaba la pynbit pynbiang da ka Ri Bhoi District Cricket Association bad ha katei ka Lympung ialehkai, ki don 6 tylli ki jylla na shatei lam mihngi ki la wan ban iashimbynta, ha kaba ki jylla kiba wan ban iashimbynta, ki kynthup ia Manipur, Nagaland, Mizoram, Sikkim, Arunachal Pradesh bad ka Meghalaya.
Ha ka jingialehkai kaba nyngkong, kaba la long hapdeng ka Meghalaya pyrshah ia ka Arunachal Pradesh, ha kaba ka Arunachal ka la jop ha ka Toss bad kaba la jied ban tied nyngkong, kumta ki la lah ban tied 78 run bad duh noh 9 ngut ki nongtied. Ki Thei ialehkai ka Meghalaya haba ki beh ia katei ka thong kaba la buh da ka Arunachal Pradesh, haduh ba kut ki 20 over, ki la lah ban tied 78 ron bad duh noh 8 ngut ki nongtied.
Katba haba phai sha ka jingialehkai hapdeng ki Thei ialehkai ka Nagaland pyrshah iaka Mizoram, ki thei ialehkai ka Mizoram ki la ioh ban tied Nyngkong bad ki la lah ban tied 61 ron bad duh lut baroh ki nongtied ha ki 19.3. Haba beh ia katei ka thong ba la buh da ka Mizoram, ki Thei ialehkai ka Nagaland ki la lah ban beh ia katei ka thong tang hapoh 12.2 over bad kamai 62 run bad duh tang 5 ngut ki nongtied bad kaba la pynlong ia ka Nagaland ba kan jop ia ka Mizoram da 5 Wickets.
Haba sdang jong katei ka Lympung ialehkai, la sakhi da ka jingdon u Naba Bhattacharjee, President ka Meghalaya Cricket Association bad uba dei ruh u Co-Convener ka North East Cricket Development Council, nangta u Bah Rayonald Kharkamni, President ka Ri Bhoi District Cricket Association, u Bah Ferdynald Kharkamni, Vice-President ka RBDCA lem bad kiwei.