‘U Daniel ha ka kitab Jingpynpaw’

AIS Suja

U Daniel ha ka Kitab Jingpynpaw: u Daniel u iathuh ia ki por jong ki 1290 sngi. Kaba mut hapoh kine ki 1290 sngi ki don ruh ki 30 sngi ……. Bad ba yn pynieng ia kata KA JINGIJLI BA PYNJOT (Abomination of Desolation) kan long 1290 sngi. Kine ki 1290 sngi, ki long ki por hapoh ka por ka jingsynshar u Mradkhlaw. Daniel 12:11. Kaba mut ka por ka jingsynshar u soitan Lucifer. Dei hapoh kane ka por kein ba u Blei un theh ia ka jingbitar ba khadduh jong u, ki 7 tylli ki pliang jingbitar kein, da kaba u hukum ha kita ki 7 ki angel jong u: Te uba Nyngkong u la theh ia ka pliang jong u ha khyndew te la long ki tohjaw ha kita ki briew kiba don ka dak u Mradkhlaw bad kiba mane dem ia ka dur jong u. Jingpynpaw 16:2.

Uba Ar pat u la theh ia ka pliang jong u sha duriaw, te ka duriaw ka la kylla snam bad ki mynsiem ba im baroh ki iap noh. Jingpynpaw 16:3. U angel uba lai pat u la theh ia ka pliang jong u ha ki wah bad ki pukri um, te ki wah ki la kylla snam, uta u angel u la ong – Me long uba hok, UBA LONG BAD UBA LA LONG, Me u Bakhuid, naba me la kut bishar kumne; naba ki la pynmih ia ka snam ki riewkhuid bad ki Nongiathuhlypa, te Me la ai ha ki ka snam ban dih; namar ki la kop hi kumta.

U angel uba saw, u la theh noh ia ka pliang jong u halor ka sngi, te la aibor ha ka ban pynshit tyrha ia ki briew DA KA DING. Kumta la pynshit tyrha ia ki briew da ka jingshit kaba khraw, te ki la kren bein ia u Blei uba don ka bor halor kine ki jingiap them: te kim shym la kylla bamut ban ai burom ia u. Jingpynpaw 16:9.
Uta u angel uba san u la theh noh ia ka pliang jong u halor ka khet u Mradkhlaw, te la pyndum noh ia ka hima jong u te ki la dait ia ki thylliej namar ka jingkordit, bad ki iakren bein ia u Blei namar ki jingkordit jong ki bad ki tohjaw jong ki: te kim shym la kylla bamut na ki jingleh jong ki. Jingpynpaw 16:10-11.

U angel uba Hynriew u la theh ia ka pliang jong u halor ka wah bakhraw ka Euphrates: te ka um ka la rngad noh ba yn ioh pynkhreh ka lynti bah ia ki syiem kiba na Mihngi. Bad lai tylli ki mynsiem bymkhuid kum ki jakoid kiba mih na ka shyntur u Mradkhlaw (ka mut na u soitan bad na uta u briew) bad na ka shyntur u nongiathuhlypa lamler (false Messiah), namar ki long ki mynsiem ki ksuid kiba leh ia ki dak khyllah, kiba leit noh noh sha kita ki syiem jong ka pyrthei baroh kawei ban ialum lang ia ki sha kata ka sngi bakhraw u Blei badonbor baroh ……. Te la lum lang ia ki sha kata ka jaka ba la khot ha ka ktien Hebru – Ka Armageddon.
Uta u angel uba Hynniew, u la theh noh ia ka pliang jong u ha suin bneng, te la wan mih ka ktien bajam na kata ka Temple na kata ka khet ka da ong – “LA PYNDEP” Jingpynpaw 16:17. Kaba mut ba u Blei u la pyndep ia ki 7 ki pliang jingbitar jong u hapoh ki 30 sngi jong kita ki por ba u Mradkhlaw u synshar hapoh ki 1290 sngi. Daniel 12:11.

Hadien ba la pyndep ia ki 7 ki pliang jingbitar u Blei, la don ki leilieh, ki jingsawa, ki pyrthat, ki jingkhynniuh jumai bakhraw, ka bym pat ju long naduh ba la don ki briew ha ka pyrthei, ka jingkhynniuh jumai bajur eh katta katta, kaba khraw katta katta, haduh ba Lai bynta ka Nongbah bakhraw bad kita ki Nongbah jong ki kynja bynriew ki la kyllon ……. Bad kawei pa kawei ka dewlynnong ka la phet iap noh bad ia ki lum ym shym la shem shuh. U phria ruh uba heh kat ka jingthew shi Talent u la hap na bneng halor ki briew te ki briew ki ia kren bein ia u Blei. Jingpynpaw 16:18-21. Kine ki long ki jingbitar kiba khadduh na u Blei ia ki briew.