Ther bom ka Israel, haduh 90 sien, haduh ban da lwet ka met u heh duh ka Hezbollah bad ka khun kynthei jongu

Ki ehrang Hezbollah, lane lada kylla sha ka phareng, kaba la tip, ka seng jong U Blei, ka la pyntip mynta ka sngi, ba u heh duh jongka, U Hassan Nasrallah, ula iap ha shen, ha ka jingther bom jong ka Israel, ha ka nongbah Beirut ha ka sngi thohdieng. Ka Israel, ka kam mynta ka sngi, ba ka la ioh ban pyniap ia utei u heh duh jong ki Hezbollah, uba don 64 snem ka rta bad uba la shim, ba u dei u heh duh jong ki kam shipai jong katei ka seng ehrang.

Haba pyntip, halor ka jingiap jong U Nasrallah, ki ehrang, ki kam, ba utei u heh duh jong ka seng, ula aiti ia la ka jingim bad kiwei pat ki shipai ialeh jong ka seng bad kumjuh na ka liang jong ka telebishon, kaba pyniaid da ki Hezbollah, ka Al-Manar TV, ka pyni ia ki jingthoh na ka Quran, ban sngewlem halor ka jingkhlad U Nazrallah.
Ki nongialam jong katei ka seng, ki iathuh ha ka kotkhubor The New York Times, ba ki la ithuh ia ka met jong utei u heh duh jongki kaba la lwet, ha ka step jong ka sngi saitjain bad ha syndah jongu, u don ruh uwei u snar ehrang, U Ali Karaki, uba la shah pyniap ha ka jingther bom ka Israel. Nalor nangta, ka Zainab Nasrallah, kaba dei ka khun kynthei jong U Nasrallah bad u heh duh kitei ki ehrang, uba peit ia ka bynta ba shathie jong ka Lebanon, U Ali Karki, ula shah pyniap, ha ryngkat bad kiwei de ki heh shipai jong katei ka seng ehrang.

Ki shipai jong ka Israel Defence Forces (IDF), ki la nion tyngeh, ha ka sngi thohdieng, ha ka por, ba ki nongialam jong ka Hezbollah, ki dang shong jingialang ha ka ophis kmie jongki ha Dahiyeh, kaba don shathie jong ka Beirut. Ha katei ka jingjia, ki don hynriew ngut kiba iap bad sa 90ngut kiba mynsaw, ha katei ka jingther bom, kaba khlain bor bha ha ka iing kaba hynriew mala bad kaba la pynkhynniuh haduh 30 kilometre ka jingjngai na ka jaka bthei bom. Ki shipai IDF, ki la ther bom haduh 80 tylli, ha katei ka ktem jong kitei ki ehrang, ong ka khubor.