Ud ki pulit ba duna briew palat ban pyniaid kali, jur ka dheng kali ha Shillong

Shillong:Ka Meghalaya State Planning Board (MSPB) mynhynnin ka sngi ka la pan jingtip na ki tnad bapher bapher ka sorkar jylla halor kiei ki daw bad kaei ka lad ban pynbeit ia ka jingsahkut kali ha ka nongbah Shillong.
Ki tnad kiba ka Board ka la pan jingtip ki kynthup ia ka tnad PWD, tnad pynroi, tnad pulit bad ka tnad ka leit ka wan.

U chairman ka Board u bah Metbah Lyngdoh ula pyntip ba kane ka jingialang ka long ban pan jingtip ia ki daw ka jingsahkut kali bad kumno ban weng ia kane ka jingeh jong u paidbah ha Shillong.
U la ong ba na ka liang ka tnad pulit ka la ai ia ka daw ba ka jingsahkut kali palat ha Shillong ka dei namar ba ki pulit ki duna briew, kim lah ban peitngor ha man ki jaka ka sor Shillong. Ki 150 ngut ki pulit pyniaid kali ha baroh kawei ka Shillong, kaba don 7 tylli ki police station nalor 400 ngut ki pulit Home Guard. Kane ka dei kawei ka daw kaba ka Board kan sap hah ia ka jingai jingmut sha ka sorkar.

“Ka tnad pulit ka la pynsngew ia ka jingeh namar ka jingduna briew palat ha kaba ki don 150 ngut eiei”, la ong u bah Metbah.
Ha kajuh ka por, u bah Metbah ula ong ba ka la donkam ia ka sorkar ban rah noh ia ki ophis sorkar sha ka sor thymmai, ban weng ia kane ka jingeh.
U la ong ba ka Board kan shu ai jingmut sha ka sorkar hynrei ha kaba kut kan shong ha ka sorkar ba kan pyntreikam ne kan pdiang ne em.