Haba sngewsih ka masi, ka don jingeh ia ka pyrthei, ong u Swami

Guwahati:”Haba ka masi ka sngewsih te ka don ka jingeh ha ka Pyrthei. Haba u masi u shitom, ka pyrthei ka jynjar.” Kane ka dei ka jingkynthoh jong u Shankaracharya Govardhan Peeth, u Swami Adhokshajanand Devtirtha, uba dang ïasaid ruh ban khang ïa ka jingpynïap masi ha ka ri baroh kawei.

Haba kyrpad ba dei ban khang ïa ka jingpynïap masi ha kylleng ka ri, u Swami Adhokshjanand Devtirth, uba don ha Guwahati na ka bynta ka jingïaseng niam, ula ong ha ka sngi palei, “Haba u masi u sngewsih te ka don ka jingeh ha ka pyrthei. Haba u Masi u shitom, ka pyrthei ka jynjar. Dei na kata ka daw ba u Blei u la wan ban iada ia u masi. Ka long ruh kaba kongsan ïa kawei ka jylla ban ïada ïa ki masi bad ban burom ïa ki da ka sorkar synshar jong ka jylla.”

Utei u monk Hindu ba pawkhmat u la ïaroh ruh ïa ka jingtrei shitom jong u Myntri Rangbah ka Assam u Himanta Biswa Sarma uba la lah ban khanglad ïa ka jingshalan tuh ïa ki masi sha Bangladesh na Assam.
“Nga ai khublei shisha ia u Myntri Rangbah ka Assam uba la pynsangeh ia ka jingkhaii tuh ia ki masi ha ka por kaba lyngkot bha hadien ba u la wan ha ka bor, namar kham mynshwa ia ki masi na Assam la shalan tuh sha Bangladesh. Mynta ka la sangeh noh ban iaid,” u la ong.

U Swami Adhokshjanand Devtirth uba la leit sha ka jingiaseng niam ha Shree Shree Rudra Mahayogya bad Kameswari Maha Aaradhana ha Guwahati ruh u la iathuh ba ki briew ha Assam mynta ki la ri masi bad kane ka jinglong ka la nang kiew.
“Ki myntri bad ki nongthaw ain ka Assam ruh ki pyniaid ia ki gaushala. Ka jingaiti bad jinglong bashisha ia ka masi ka la nang kiew,” u la bynrap.