Hiar jurip ka PAC, ia ka skim sam Umbam ha Raliang

Jowai, 19 Naiwieng:
Ka Public Account Committee hapoh ka jingialam u Paul Lyngdoh, MLA Jaiaw kum u chairman, u ma Hopeful Bamon MLA -member, ka kong Bluebel Marak MLA – member, ha ryngkat u local MLA u ma Coming Ymbon, u Additional Chief Engineer, TR Talukdar, nalor kiwei kiwei ki heh ka tnad PHE na Shillong bad na Jowai, mynta ka sngi ki lahiar ban jurip iaka skim umbam kaba la mang ban pyntrei ha Raliangnaduh u snem 2011.Naduh u 2011 haduh mynta katei ka skimsam um ka dang sah khlem da lahpyndep wat hadien ba la mang ban pyndep ia ka hapoh u snem katkum kajingmang ban pyndep hapoh ar snem.Ka dor jong kane ka skim ka long 21.56 klur ha kaba u Myntri ka sorkar jylla uba dei peit ia ka PHE –u bah Prestone Tynsong ha katei ka por ha ryngkat u ma Coming One Ymbon uba dei u Local MLA bad Parliamentary Secretary ka Sorkar jylla, nalor kiwei kiwei ki la wan ban plie donburom ia u maw nongrim na ka bynta ban pyntrei ia ka skim sam um. Ia katei ka skim la mang lyngba ka DoNER ka sorkar kmie lyngba ka Ministry of DoNER kaba la tip kum ka Non lapsable central pool of resources (NLCPR) bad kane ka project kan pynbiang um ia ki 30 tylli ki shnong kiba hapoh kane ka skim kaba la tip kum ka Greater Raliang Water Supply Scheme (GRWSS) Na ka liang u bah Pual Lyngdoh uba dei u Chairman ka PAC u la ong Na ka liang ka jingwan ka long ban jurip ia kane ka skim, la dei ban pyndep ha u bnai March 2016, hynrei ynda ngi la wan hangne ngi ioh ia ka jaka bad na ka daw ka jingpynthut ka mariang, yn lah ban pyndep tad haduh u snem 2017. Ka jingtrei kam pat stet kumba khmih lynti bad ki Drawing estimate ki dang sahkut bad submit bad ngi la ai ka jingbthah ia u Engineer ki dei ban submit noh sha ophis u CE ha kane ka taiew ban wan. “Ngi khmih lynti ba kane ka skim kaba lah ban sam um haduh 1 million 68 Litre kan ai jingmyntoi ia ki paidbah jong ki 30 tylli ki shnong katei ka thain”, la ong u bah Lyngdoh