Shillong: U nongwad ia ka hok jingtip ne Right to Information (RTI) u bah Disparsing Rani ula ong ba ka jingsahkut ki surok khongreng ha kylleng ki jaka, ka dei namar ba ki kontraktor kiba ioh kam, ki dei kiba shu kynthih klas, khlem kano kano ka jingshemphang.
Haba sei ia ka jinglap jongu lyngba ka RTI halor ki surok ha thain Upper Shillong, u bah Dsiparsing ula ong ba ka jingslem ka surok ka dei namar ba ki kontraktor ki shu ryngkang klas, ka mut ba ki ioh klas II ne klas I khlem iaid shwa na ka klas III bad khlem kano kano ka jingtbit.
“Ha ka jingthoh ki pyni ba ki biang ki tiar ki tar mashin hynrei ha jingshisha kim don. Bun ki kontraktor ki shu kynjih klas sha ka klas II khlem iaid ia ka klas III bad dei na kane ka daw, ki surok ki sahkut lut khongreng”, la ong u bah Disparsing.
U bah Disparsing ula wad jingtip ia ka surok na Mawphlang sha Weiloi, nangta ka surok na Umlyngka sha Mawklot. U la ong ba katkum ka jingtip kaba la ioh, ka jingslem ban pyndep bad ka jingsah khongreng ki surok ha Meghalaya ka dei namar ba kim don ki kor ki bor ne ki mashin kiba biang katkum ba ka dei ban don.
Kine ki daw ki la pyllong ia ki surok ban shu sah khongreng bad ha kane ka jylla, dei tang ka Dhar Company kaba don ki tiar mashin kiba biang.
U la ong ba ka surok na Umlyngka sha Mawklot kane ka surok kam shym la iaid la shi snem tam bad bun ki briew ki la mynsaw ba shu siang maw khlem don rong eiei.
U la ong ba ka jingshna pynheh ia ka Mawphlang sha Weiloi kam dei ban duna ia ka 3 metre shiteng nalor ka jingshna ia ki nala nalor kiwei kiba dei ban leh katkum ka jingthew thik pa thik. Hynrei kaba lyngngoh ka long ba ka surok na Mawphlang sha Tyrsad ka la jot noh hadien ba la shna katto katne bnai.
Ha kajuh ka por ula pynpaw ia ka jinglyngngoh ba ka RTI kaba u la pan jingtip, ka dang sah da ki spah tylli khlem ioh jingtip ha ka por kaba biang bad ula pynkhreh ban ujor ejahar ia kiba bat ia ka RTI
Em ka daw ka long ba ki ialeh kat ba lah ban thep sha pla, kim khieñ kor shuh ia ka imlang sahlang kut sa tang ka trei torti