Ka PHC Rangthong khlem doctor

Shillong, 3 Jylliew:
Ka KSU Kynsim phlang Unit ka la pyrshah jur ia ka sorkar halor ka jingleh bym suidniew ia ki jingeh jong ki paidbah, ha kaba mynta la jan 7 bnai kynthih naduh ba la pynkynriah ia u Doctor MBBs napoh Rangthong PHC haduh mynta ym pat don doctor ha kane ka PHC . Kane ka jinglong kuman jong ka sorkar ka la buh jingeh ia ki paidbah ym tang hapoh ka shnong Rangthong hynrei ka la ktah ia kiwei kiwei ki jaka jong ka dong bad ka thain baroh kawei khamtam eh ia ki briew ba duk.
Ka seng ka la pynpaw ia ka jingsngewsih bad ka jingsngediaw halor ka jingleh klet bad leh mynthi jong ka sorkar. La ong ba kane ka jingleh jong ka sorkar ka ktah ia ka iap ka im jong ki paidbah .
Shuh shuh la ong ba kane ka jingleh jong ka sorkar bad ka tnat kadei peit ia ka koit ka khiah ka la kdew shai ba ba ki niew bein ia ki paidbah jong ka dong bad ka thain hi baroh kawei.
Na ka liang jong ka KSU Kynsimphlang Unit ka la ai ka jingkyrshan ba pura bad kan iatreilang bad ka KSU Rangthong Unit ha kaba iadei bad ka jingbuh por jong ka sorkar ban phah Doctor ha Rangthong hapoh ka 2 tarik u Jylliew. Bad la ong ba lada ka sorkar kam lah ban pynurlong hapoh katei ka tarik ba la buh kaimbanse ban shim noh da ka siem jam kaba kham tyngeh.
Ha kaba iadei bad kane na ka liang ka KSU Kynsimphlang Unit ka la khot bad iawer ia ki paidbah baroh kawei ka thain ban iasnoh kti lang bad ka seng khnang ba kan nym long ka jingduhnong ia ki paidbah khamtam eh ia u kup shiliang sem shiliang bad ia u rangli juki.