Ka FTD kan long ka metbah ia ki nongsynshar ka jaitbynriew

Shillong, 18 Naiwieng:
Ka Khasi Hills Autonomous District Council (KHADC) ka la pynkhreh shaid shaid ban thaw ia ki riti treikam ne ki kyndon jong ka Federation of Traditional Dorbar (FTD) ban kdup ia baroh ki nongsynshar ha kawei ka rynsan naduh ki Syiem, Lyngdoh, Sordar, Rangbah Shnong, kaban long ka metbah ban iatai ban saindur ia ka synshar khadar.
Mynta ka sngi, ka Executive Dorbar kaba nyngkong jong ka FTD ka la shong jingialang ban pynkhreh ban thaw ia ki kyndon shwa ban leit rah pat sha ka dorbar ka KHADC ban pdiang khnang ba kan long ain.“Ka FTD ka dei ka metbah ka jaitbynriew bad yn don ar tylli ka met—kawei ka Executive Dorbar bad ka Dorbar Pyllun”, la ong u CEM ka KHADC u Bah Pynshngain N Syiem haba kren sha ki nongthoh hadien ba la wai ka jingialang kaba la wan iashim nynta 36 ngut eiei ki khlieh nongsynshar.
Katkum ka jingong u CEM, ka  jingthmu ba kongsan ka long ban wanrah ia ka jingiatylli bad ban iada ia ka jaitbynriew bad ban long ruh ka rynsan ka jingiasngewthuh jingmut ban rah ban kren ia ki mat kiba iadei bad ka jaitbynriew.“Ka jingialang hynne ka sngi ka la lah ban pyndep bun bad ka thong ka long ban pyndep noh kloi ia ka jingshna ia ka riti treikam ka KHADC Constitution of the Federation of Traditional Dorbar Bill”, la ong u Bah Pynshngain bad bynrap, kaba sah ban pyndep ia ka kam kan long sa tang 30 percent eiei. Hadien ba la pyndep ia ka jingshna ia ka Bill, yn sa lum pat ia ka dorbar pyllun ban mynjur ban pdiang ia ka Bill shwa ban mynjur ha ka iing dorbar ka KHADC. U Bah Pynshngain u la ong ba ka Executive Dorbar kan hap hapoh ka jingpeit ka Dorar Pyllun bad kan treikam bad leh ia ki rai ba la bynshet da ka Dorbar Pyllun kaban don ki dkhot ym duna ia ka 10 hajar ngut na kylleng ki shnong, Hima, Raid. Ia kine ki dorbar yn khlieh hi da u CEM ka KHADC.
“Ia ka jingdon ki dkhot ka Executive Dorbar yn sa iakren bniah bad ka por jong ka jinglong dkhot kan long 3 snem”, la ong u CEM ka KHADC. Ban pyniaid shakhmat ia ka kam, ka FTD kan sa shong jingialang biang ha ka 3 tarik Nohprah ban wan.