10 bnai khlem tulop ki nongtrei ka MCCL

Shillong 18 Naiwieng:
Ki nongtrei ka karkhana sorkar ka Meghalaya Cherra Cement Limited (MCCL) ki lah ban pynlong syndon da ka jingiakhih lada ka sorkar kam pynlait noh ia ka tulop kaba 10 bnai haduh mynta.
“Ngin ap ia ka shithi na  u Managing Director (MD) lashai kaba u la kular ban phah bad ngin sa shong jingialang halor ka jingthoh”, la ong President ka Meghalaya Cherra Cement Limited Employees Union (MCCLEU) u Bah S Wahlang haba iakren hynne bad ki nongthoh khubor hadien ba la iakynduh ia u MD ha Shillong. Ki nongialam ka MCCLEU hynne ki la iakynduh ia u Managing Director ka MCCL u Sanjay Goyal ban kyntu ia u ban pynlait noh ia ka tulop jong ki nongtrei kaba sah pongding la shiphew bnai mynta.Ka jingbym ioh tulop haduh jan dap shi snem, ka la pyndukha mynsiem ia ki nongtrei ka MCCL kaba la buh ia ki ha ka jingeh ban pyndap pynbiang ia ka iing ka sem bad ki jingdonkam.Ngi la iakynduh ia u Managing Director (MD)  bad ngi la kyntu ba un pynlait noh ia ka tulop jong ngi kaba la shi phew bnai”,  la ong u Bah Wahlang.
U Bah Wahlang u la ong ba ki don  haduh 500 ngut ki nongtrei ka MCCL kiba shong khlem tulop mynta la shiphew bnai.  U la iathuh ba u MD  u la pyntip ia ki ba ka jingbym siew ia ka tulop ka dei namar ba ka kompeni kam don pisa naduh ba ka karkhana ka la sahngeh ban treikam la jan shi snem mynta bad mynta ka sorkar ka hap ban wad pisa.Ka karkhana barim ka MCCL ka la sangeh ban treikam  la jan shi snem eiei mynta bad ka jingpyndait ia ki kot ki bor thymmai ha ka karkhana thymmai ka dang iaid shaid shaid haduh mynta.