Da ki nia pynkyllain jelbi pynkulmar ka sorkar MDA, halor ka ram, ong u Mukul

Shillong:U nongialam ka liangpyrshah u Dr. Mukul M Sangma mynhynnin ka sngi u la kam ba kane ka sorkar MDA-2 ka la pyndonkam da ki kyntien jelebi ha kaba iadei bad ka jingshim ram bad ka rukom pyndonkam ia ka pisa pilain jong ka jylla, khnang ba ki paidbah kin ym sngewthuh ia ki kam buittuh jongki.

Haba kren mynta ka sngi halor ka kaiphod u Comptroller and Auditor General of India (CAG), u Dr. Mukul ula ong ba u CAG u la wanrah ia ka kaiphod hadien ba la bishar, eksamin, bad pule bniah bad jurip ia kiei kiei baroh katkum ka ain.

U la ong ba u sngew lyngngoh kumno ka sorkar ka padiah pathar ia ka ktien da kaba batai bakla ia ka kaiphod jong u CAG 2022-23. U la ong ba ka sorkar ka la wanrah da ki buit ban taplup ia ka jingshisha na ki paidbah da kaba wanrah da ki kyntien kiba kyllain ki bym sngewthuh ia ki riew madan.
“Kila wanrah ia ki ktien ban pynkulmar ia ki paidbah ba kin ym sngewthuh ia ki buit tuh jong ki”, la kam u Dr. Mukul. U la ong ba ka ram kaba ka sorkar ka la jubor bha namar ba ka shim ram ban siew ia ka ram katba ka jingmih kam don bad ka long kumba bam hati kit kulai. Ha ka jingshisha, ka sorkar ka dei ban iaid katkum ka Fiscal Responsibility and Budget Management (FRBM) Act 2006, kaba la batai bniah ia ka rukom pyniaid ia ka pisa pilain jong ki jylla.

Dang shen, u myntri rangbah u Conrad K Sangma u la ong ba ka kaiphod u CAG ka dei ha kawei ka bynta namar ba ka shim ia ki kam ba ka sorkar kam pat dep.
Katkum ka jingong u Dr. Mukul, ka sorkar jylla ka la pyllut tang 44 percent ia ka pisa kaba shim ram ban pyntreikam ia ki projek katba kaba sah kila pyndonkam tang ban siew biang ia ka ram. U la ong ba ha ka sorkar barim jong u, ka jingbuh ia ka jingduna pisa ka long tang hapoh 3 percent hynrei kane ka sorkar kala kiew shaduh 5.25 percent ha u 2021 bad ha u snem 2023 kila buh 4 percent katba ka ram ban siew ka long 28 percent katjuh ha baroh kine ki snem, katba ha ka kaiphod u CAG, ka ram (debt to GST) ka la kot sha ka 43 percent.
“Kane ka sorkar ka shim ram ban siew ia ka ram kaba ka la shim, bad kane ka long kaba dei ban pynrem jur namar ba kan buh ka jingma ia ka lawei ka jylla”, la ong u Dr. Mukul.