Ha ki khyndiat sngi ba ladep, ka la mih ka jing ia pyni nia hapdeng U Bah Ardent Basaiawmoit, MLA jong ka Nongkrem bad U bah Lambor Malngiang, MDC jong ka Nongkrem, halor ka kyntien expiry date, kumba la kynnoh da U bah Ardent, ia kine ki MDC kiba mynta bad nangta sa ka jingpynshai jong U bah Lambor, da kaba u kynnoh ba U bah Ardent, ula iehnoh ia ka jinglong MDC khlem pat dei por.
Haba iakren ia kane ka mat, ka mih namarkata, ka jingkylli, la un kham lah uba kyllon noh mar ia hiar madan, ne un kham lah pynban, da uba ialehkai tam, wat haba la kut ka por ialehkai ruh. Kane ka mat bad ka jingshisha, ka wan bha ha ka por ialehkai phutbol, ba haba la sdang ka jingialehkai, kam ju kham jia koit ban pynsangeh noh, hynrei kito kiba mih noh shabar ka madan, ki dei kiba mynsaw jur, kiba la hap ban shu rah ha ka jingthiah lane kiba dei ki nong ialehkai ki bym ler tasam, kiba la shah khot noh ha u nonghikai jongki; katba ka jingialehkai tam por, te ka ju don bha, khamtam haba mar ia khlain baroh arliang, ha kaba ka ju mih kaba ialeh extra time bad wat ban shut penalty ruh bad haba kumta, katei ka shimpor haduh shi kynta shiteng, ba kan kut ka jingialehkai kaba ia khlain baroh arliang.
Halor kane ka mat, ka jingshisha, ka long ba kine ki MDC, kiba mynta, ki la dei ban kut por, ha u snem 2024, hynrei, ki la bteng tam, ia ka por treikam jongki haduh u snem 2025 bad ngim tip, ia ka daw, ba ki pynslem, namar ba haba shu peit nabar, ngi iohi ba kim don ha kano kano ka madan ialehkai, kaba u rephri, u dei ban ai por tam ia ki, hynrei lada ka jingphiah ia ka Mawlai Constituency, kaba dei hi tang katei kawei ka mat, kaba kham iakren bha, ka donkam ban aipor tam haduh shisnem, kumta, katei kein ka dei ka daw kaba donkam ia ki 30ngut ki MDC, ba kin ia duriap ban pynkynriah ia ki shnong ki thaw jong katei ka Constituency kaba heh tam ha ri Khasi.
Ha kawei pat ka liang, ka wan sa kawei ka mat bad kata ka long, ba kaei ka daw kaba la pynlong ia U bah Ardent Basaiawmoit lem bad ki 5ngut ki MDC (kynthup ia u bah Metbah Lyngdoh, Bah Brol Nongsiej, Bah KP Pangniang, Bah Stephan Mukhim, bah Sanbor Shullai), ba ki resain noh, na ki kam jongki, ha u risaw 2015, haba ki dang shu ia jop MDC ha u snem 2014? Hangtei u don u dak jingkylli, uba heh bha, ha kaba U bah Ardent bad kitei ki 5ngut ki MLA/MDC, ki dei ban jubab sha u paidlang ka jylla, namar ba uba ieng skhem, ha katei ka por, u dei tang u bah PN Syiem MDC jong ka seng Congress.
U paidlang ka jylla, u dei ruh ban kynmaw shai, ba kitei ki 6ngut ki MLA/MDC, ki leit hiar shuki noh ialade, lane ki leit mih noh na ka madan ialehkai, ha ka por ba ka jaitbynriew ka don ha ka saw ka sian bad ia kata ngi dei ban kynmaw, ba ka dei ha u nohprah 2014 (hadien ka elekshon MDC), ba ka Meghalaya High Court, ka la pynduh bor noh ia ki Rangbah Shnong ha ka ri Khasi, Jaintia bad ka dei ha kaba kum katei ka por, ha kaba kitei ki MDC, ki la mih noh na madan ialeh, hynrei U bah PN Syiem, uba dei ruh U CEM, ha katei ka por, u iakhun ban pynneh ialade kum U MDC bad u iakhun ban pynneh ia ka bor jong ki Rangbah Shnong bad ka rai ksan ka sa mih na ka Supreme Court of India. Kam dei tang katta, kaba u paidlang ka jylla, um dei ruh ban klet, ka long ba kitei ki 6ngut ki MDC, ki iehnoh ia la ka jong ka lyngkor, ha ka por ba ka ri Khasi, Jaintia, ka don ha ka saw ka sian, ha kaba ngi ia kynmaw bha, ba u paidlang ka ri Khasi, Jaintia, ula shlei mam ha ki surok bah ka sor Shillong bad ha madan Polo, na ka bynta ka jingiakhun pyrshah ia ka hukum jong ka High Court bad ka sorkar jylla, kaba la khlieh da U Mukul Sangma, ha katei ka por.
Ki don shibun kiba la klet noh ia kitei ki jingjia kiba kongsan bha jong u snem 2014-2015 bad kiba la buh ia ka jaitbynriew ha ka jingsyier mynsiem kaba jur, ha kaba ki bor shnong, ki la hap ban mih madan dalade hi, ban pynneh ia la ka jong ka iktiar jongki.
Kawei pat ka mat, ka long ruh ba kane ka jingphah Constituency, ka dei ban don da ka por bad ba ki dei ban don da ki briew kiba shemphang, ki ban shimti ia katei ka kam bad ba kan nym don ka jingphiah Constituency katba mon lane kynriah elekshon, katba ki sngewbit kiba don ha ka sorkar.
Phi don ban ong eiei?