Ki la bun bah ki jingshah pynbudnam jong kane ka sorkar Meghalaya Democratic Alliance (MDA), ha kine ki khyndiat taiew ba ladep bad kitei ki kynthup ia u ma Sniawbhalang Dhar, symbud myntri rangbah ba ar bad uba la dawa bai mynrain khmat kaba T.100klur, na U ma Vincent Pala bad nangta, ka bud sa ka jingshah kynthoh ha U Comptroller and Auditor General (CAG) jong ka sorkar India halor ka jingshim ram palat pud bad nangta sa ka jingwohnia jong ka seng BJP, ia ka skhim um lane ka JJM.
Ki jingshah kynnoh ki don la ki jong ki jong ki rukom, ha kaba u ma Sniawbhalang, ula iaid dalade hi ban iakhun pyrshah ia U Ma Vincent Pala, MP barim, namar ba lehse, u shim, ba katei ka dei ka jingkynnoh shimet ia u, hynrei katei ruh kam da dei eh kumta, namar ba lada ka jingkynnoh, ka dei ia u myntri sorkar bad ynda la tohkit, kin don shibun ruh kiwei ki minister lane ki ophisar, kiba dei ban ia bit thit lang, khamtam lada ka jingtohkit kan wan na ki tnat jong ka sorkar India.
Hynrei ka mat kaba kongsan bha hangne, ha kaba iadei ia u luk u lak, kan dei halor ka jingsangah tyngeh jong U CAG, ha kaba ula buh ia ka kyntien debt trap ia ka jingshim ram palat pud jong kane ka sorkar jong U Conrad Sangma, ha kaba ula maham tyngeh, ba kane kan dei ka shangkhawiah kaba ma shibun ha ki snem ki ban sa wan bad la pyni ruh, ba ka jingsiew ram, ha ki 10 snem ki ban wan, kan poi sha ka T.1,600klur tam ha ka shisnem shisnem.
Kam dei tang kata, ha ki khyndiat sngi, ba ladep, ka la mih sa ka jing ujor na ka BJP, ia ka jingbym larkam jong ka skhim sam um JJM bad kane ka la pynbitar ia katei ka seng, haduh ba kan da byrngem ban ai syndon da ka mukotduma pyrshah ia kane ka sorkar jylla.
Kitei ki jingkynnoh ar tylli haneng, ki la pynlong ia u myntri rangbah bad ia ka tnat PHE, ba kin kren sha ki kotkhubor bad ba kin ai jingpynshai ruh kumjuh, halor ka jinglong jingman jong ka jingshim ram bad kumjuh halor ka jingsam um; hynrei kaba kongsan hangne, ka long ba kitei ki ktien tap eit miaw, na ki tnat sorkar, kim don jingmut satia ha khmat jong u paidbah bad lada ka sorkar jylla, ka kwah ban iashai, ka la dei ban jied da ki riew pdeng lada dei ia ka jingkynnoh jong u CAG lane kumjuh ia ka jing ujor jong ka BJP bad ia ka skhim um lei, ka donkam, tang ka jingtohkit, ha kaba ki nongthoh khubor, ki dei ki sakhi kiba biang tam, ba kin leit sha ki shnong, ban lum ia ki jingtip bad ban sa pynmih ia ki jinglap jongki, la ka skhim um, ka la poi sha ki 5lak ngut ki long iing ne em.
Kane ka rukom ban sait ksan eh dalade bad ialade, kam don jing myntoi satia, namar ba kane ka dei ka juk jong kiba stad ba nang, ha kaba ki kham tip kham bha ma ki, ban ia u myntri rangbah ne ia ka tnat PHE ruh bad lada dei ban ia tih tyllong ia ka jingshisha, ka donkam ban wad da ki riewpdeng, kiba lah ban pyni da ki sabut kiba biang, halor ka jingsait khuid jong ka sorkar jylla ialade.
Phi don ban ong eiei?