Khyndiat sngi mynshwa, U MP jong ka Shillong, U Dr Ricky Syngkon, ula leit jurip hi dalade ia ka lain surok jong ka Umiam sha Malidor, halor ka jingshah kynnoh ba katei ka lain ka leit poi sha ka tyllong um ha Umroi Madan jong ka Ribhoi District.
Sngewieid bad sngewhun shibun eh, ba kat ka kyrdan jong U MP, u leit ban rung sha ki khlaw ki btap, na ka bynta ban wad ia ka jingshisha, halor katei ka jingjurip surok, kaba hap ha u pud u sam jong ka jingtreikam jongu bad kane ka jingleh jong une u MP, ka pyni ba u dei shisha u MP jong ki paidbah bad uba sngap ia ka eh ka shon jong u luk u lak bad ka dei ruh ka jingleh, kaba ngim pat ju lap ia ki MLA jong kane ka iing dorbar, ba kin leit jurip ia ki shnong ki thaw, haba don ka jingbymhun halor ki skhim bapher bad ba ki MP, kiba mynshwa, ba kin shim ia kane ka bynta; namar ba kiba bun, lada dei ki myntri sorkar, u myntri rangbah lane ki MP, ki pynlut por tang ban leit buh maw nongrim bad ban ot ribon, hynrei ban leit peit ia ki kam thombor jong ki ophisar ne ki kompeni, la ju aiti ha ki shakri sorkar, ba kin hiar madan.
Ngi iohsngew ia kita ki jing ia pyni bor sha Western Bye pass bad kumjuh ia ka surok Shillong Dawki, hynrei la iohi ba la ailad ia ki riew paidbah, ba kin ia tyngkhuh hi bad ki tnat sorkar lane bad ki kompeni, katba ki minister ne ki MP, ki shu sngap beit man man bad kim kwah ban tih tyllong ia ka jingshisha, halor kiba kum kine ki jakri jakra.
Ka surok Shillong Dawki, lei ka la pheil lut nadong shadong, ha kaba wat u myntri PWD, ula kren pyllait met ialade, da kaba u ong, ba ka tnat NHIDCL, kam sngap satia wat ia u ruh, namar ba ki la dep iakren da ki spah sien, ia kajuh shi kajuh; hynrei haduh ha kine ki sngi, ngim shym la iohi satia, ia ka MDC/MLA ne ia uno uno U MP, ba kin hiar sha kitei ki jaka, ban sngap dalade ia ka sur jong u paidbah bad ban tip ia ka liem ka lup, halor katei ka jingtrei surok.
La iohsngew ruh ha kiba bun ki khep, ba ha shwa ban trei ia kiba kum kine ki surok heh, ki ksiang jong ki MLA, ki minister, ki la tip shwa ma ki bad kine kin leit ban pynbiej ia ki trai jaka, da kaba kin pan thied ia kito ki jaka lane kin leh ialade kum ki ksiang ban iakren bad ki bor sorkar ba kin ioh thep pla ia ka pisa kaba bun bad katei ka dei ka jingshisha, kaba la jia ha ki jingai lain surok bad dei na kata ka daw, ba ka sa mih ka jing iakhih pyrshah jong ki trai shnong, na ka jinglalot pisa jong ki briew ki MLA, ki minister, namar ba ki pynkyllain jelbi ia u lain, ba kin pynrben pla pat ialade.
U Dr Ricky, kum U MP jong u paidbah, ula leh ia kaba dei than, da kaba u leit ban tih bniah ia kane ka lain surok kaba thymmai, kaba shongdor haduh T.20hajar klur ia ka pla jong u paidbah bad ia kat katei ka surok saw tylli ki kali, ban shu ialeh khohreh ne thombor ia u rit u ria, ka long ka bym iahap satia.
Kam dei tang katta, hynrei U MP, ula dei ruh ban khniot tyngeh ia ka jing ia sylla jong ka sorkar jylla bad ka sorkar India, ha kaba pyniaid ia ki skhim, khlem ka jingtip jong u dkhot ka Parliament. Kane ka bym lah long bad U MP, ula dei ban khot hajir bad pynbat shkor ia ki ophisar jong ki District, ki Engineer jong ka PWD lane ka NHIDCL, ba kim dei ban iaid sop sop ia kane ka kam bad ka sorkar Jylla, hynrei ba ki dei ban pyndem ialade ha ka bor jong U MP, namar ba kane ka pisa, kam dei kaba wan na ka pla jong ka sorkar jylla, hynrei kaba hap ban mynjur hapoh Parliament.
Phi don ban ong eiei?