Ki UC u CAG kam dei jong sorkar India/kam don ruh ka jingpynphai pisa, ong u MR

Shillong:U myntri rangbah ka jylla u Conrad K Sangma u la ong ba ka jingpaw ka kaiphod ha u Comptroller Auditor of General of India (CAG) ba ka sorkar jylla ka khlem aiti ia ka Utilization Certificate (UC) ia kumba 400 tylli, ki dei jong ka sorkar jylla, bad kim don jingiadei eiei bad ka sorkar India.

Haba kren mynta ka sngi, u la ong ba kine ki UC ki dei ba ki tnad ka sorkar jylla kim pat aiti ia ki UC sha ka tnad iarong pisa ka jylla, ha kaba kam don eiei ka jingiadei bad ka sorkar India. U la ong ba ha ka sorkar jylla, haba pyntreikam ia ki projek, ki tnad sorkar jylla ki dei ban aiti ia ki UC ba kila pyndep ia ki kam jongki.
U la ong ba haba ka sorkar jylla ka pyntreikam ia ki projek kum ka jingshna ia ki skul, Sub Centre bad kiwei, ki tnad ba dei peit, ki hap ban aiti ia ki UC sha ka tnad iarong pisa ka jylla bad kane ka dei ka sienjam kaba biang na ka bynta ban wanrah ia ka jingshai ha kaba pyntreikam ia ki projek.

Haduh ka 31 tarik Lber 2023, ki don 454 tylli ki UC kiba la kot sha ka T.3436.01 klur tyngka kiba khlem pat aiti ia ki UC sha ka tnad pla tyngka ka jylla bad kane ka pisa ka dei kaba ai ka sorkar jylla sha ki tnad kum ka grant ban tei ia ki skul bad kiwei.
Ha kajuh ka por, u la ong ba ka jingkdew ka CAG ba ka sorkar jylla ka la pynphai ia ka pisa, kam dei satia.
U Commissioner & Secretary uba dei peit ia ka tnad iarong pisa u Dr. Vijay Kumar haba pynshai halor kane, u la ong ba ha ka mang tyngka, ka dei ka jingkhmih lynti ne antad ia ka jingmih bad ka jingpyllut namar ba ka pisa kam wan shisien wan. U la ai nuksa ba ka mang tyngka mynta u snem ka long T.27 hajar klur eiei hynrei ka ioh pisa 24 hajar bad kumta haba ka sorkar ka mang 100 tyngka ia kawei ka tnad, hynrei ka ioh pisa tang 90 tyngka namar ba kim ioh 100 tyngka kumba la mang bad na kane ka daw, kaba 10 tyngka kaba khlem ioh pisa ban pyllut, la pyllong kum ka pisa kaba la pynphai wat ha ka jingshisha kam dei kumta, namar ba ka dei ka jingmang pisa hynrei khlem ioh ia ka pisa.

Ha kane ka rukom lah ban ong ba ka dei ka jingpynphai ia ka mang tyngka, ym dei ka jingpynphai ia ka pisa.
Ha kajuh ka por, u Conrad u la ong ba don pat ki tnad kiba pyllut tam na ka jingmang pisa bad dei na kane ka daw, ba ka sorkar ka ju wanrah ia ka Supplementary Demand ha iing dorbar hynrei haba ka biang ka jingwan pisa pat ka sorkar ka ju wanrah da ka Appropriation Bill ha kaba hapoh ki tnad sorkar lah ban pynphai ia ka pisa na kawei sha kawei pat.