Kmen ki paidbah Umwang ba wan ki pulit Meghalaya

Nongpoh 17, Naiwieng:
Ki paidbah ka shnong Madan Umwang ka Raid Nongtung ki la kmen ban iohi ia ki bor pulit ka jylla kiba wan hiar sha kane ka shnong ban tohkit bad ban ai mynsiem ia ki halor ka jingshah thombor ha ki bor pulit ka Assam ha katei ka shnong.
Ki bor pulit ka Assam ha ka 11 tarik mynta u bnai ki la leit ban pynsangeh jubor ia kawei ka jingtei jong ka Eri Worm lyngba ka tnat Sericulture jong ka sorkar Meghalaya kaba la ioh kyrpang da ka shnong Madan Umwang.
U Rangbah Shnong ka Madan Umwang u Bah Blikson Mukhim u la ong ba ki paidbah nongshong shnong ki la sngew kmen ba ki la iohi ia ki bor pulit hapoh ka jingialam jong u I/C ka Mawlasnai Police Outpost kin wan ban jurip, ban tohkit halor kane ka jingjia bad ruh ban ai mynsiem ia ki paidbah halor kane ka jingjia.U la pynpaw ka jingleit ud leit nam sha ki bor jong ka district ka la long kaba urlong hadien ba ka DC ka la dep ban kular ia ki ban phah ia ki bor pahara sha kane ka shnong kiba im ha ka jingsngew syier hadien ba la shah pyndik ha ka Assam.