Eksamin ka sorkar ban plie biang ia ka surok Them Ïewmawlong, ong u bah Prestone

Shillong: U Symbud Myntri Rangbah ba khmih ia ka tnat Kam Pohïing (Police), u Bah Prestone Tynsong u la ong ba hashwa ban plie biang ia ka surok ha Them Ïewmawlong donkam ban da bishar bad wad jingtip ba bniah ba kan nym ktah ia ka suk ka saiñ.

U Bah Prestone u la pyntip ia kane haba jubab ia ka jingkylli bynrap jong u MLA ka VPP na North Shillong, u Bah Adelbert Nongrum halor ka jingkhapngiah ki surok hapoh sor Shillong.
Haba wanrah ia ka jingkylli, u Bah Adelbert u la ong ba kadaw bah jong ka jingdheng kali ha ka thaiñ Motphran bad Them Ïewmawlong kadei namar ka jingkhang sah ia ka surok kaba mih na Ïewmawlong sha Bimola, ha kaba u la buh jingkylli ruh ia ka Sorkar halor ka jingkhang sah ia katei ka surok mynta ka palat 6 snem.

Haba jubab halor kane, u Symbud Myntri Rangbah u la ong ba ka Sorkar ka la dep ban shong jingïalang ban iakren kumno ban plie biang ia ka surok ha Them Ïewmawlong. U la ong ba ka Sorkar ka donkam ban ioh jingtip shwa lada ka mut ban plie biang ia katei ka surok namar ka la ktah ia ka suk ka saiñ, bad pyntip shuh shuh ba ha ki khyndiat sngi ban wan un sa ioh ia ka jingtip kaba bniah bad ka sorkar kan sa shim ia ka rai.

“Ka sorkar kan sa bishar ban plie noh shen. U la ong ba ka sorkar ka hap ban bishar bha namar ba kane ka surok ka iadei ruh bad ka shong suk shong sain”, la ong u bah Prestone.